A batalla eólico acabará no Tribunal Europeo a pesar de anularse a consulta ao TXUE tras un recurso da Xunta
O Tribunal Superior de Xustiza de Galicia decidiu anular a consulta ao TXUE tras un recurso da Xunta que provocará máis atrasos na política eólica galega. Con todo, a batalla eólica dirimirase, finalmente, en Luxemburgo.
- Rueda acusa ao TSXG de non pensar nas consecuencias de remitir a paralización eólica ao Tribunal Europeo
- O TSXG quere que a xustiza europea se pronuncie sobre a legalidade dos parques eólicos aprobados pola Xunta
Por Europa Press / Redacción | SANTIAGO DE COMPOSTELA | 16/04/2024 | Actualizada ás 21:35
A sección terceira da Sala do Contencioso-Administrativo do Tribunal Superior de Xustiza de Galicia (TSXG) decidiu anular a consulta prexudicial ao Tribunal de Xustiza da Unión Europea (TXUE) por un defecto procesual. Unha decisión que se toma tras comprobar que a consulta non ouvira ás partes implicadas.
Foi a Xunta a que presentou un incidente de nulidade desta consulta prexudicial por non darse audiencia ás partes, cuestión agora recoñecida polo TSXG. Con todo, este trámite o que fará e atrasar a batalla eólica nos tribunais galegos porque segundo fontes xurídicas consultadas por Galicia Confidencial, é moi probable que, tras ser escoitadas as posturas do Goberno galego e das empresas afectadas, a causa volva ser remitida ao TXUE para que sexa en Luxemburgo onde se dirima o futuro eólico de Galicia.
O pasado mes de marzo, o TSXG expuxo unha tripla cuestión prexudicial ao Tribunal de Xustiza da Unión Europea (TJUE) para que determine se a Xunta debeu pór a disposición do público interesado (non só dos promotores) os informes sectoriais sobre parques eólicos para que puidese, no seu caso, formular alegacións e participar no proceso de toma de decisión sobre as autorizacións dos proxectos antes de que fosen aprobados. Eses informes sectoriais conteñen información sobre materia forestal, de augas, de patrimonio natural e cultural, de turismo, de saúde, de enerxía eléctrica e de seguridade aérea, entre outros.
Os maxistrados informaban de que esperarán á resolución europea para resolver sobre a legalidade da autorización da Xunta para construír do parque eólico A Raña III, no municipio de Mazaricos (A Coruña). O auto agora emitido dispón repor as actuacións ao estado inmediatamente anterior ao defecto que orixinou a nulidade, así como seguir o procedemento legalmente establecido. Con todo, unha vez escoitadas ás partes, o TSXG ten dúas opcións, ou reverter este decisión ou continuar con ela ata o final para que sexa o Tribunal Europeo, con sede en Luxemburgo, o que ditamine a última palabra.
GUERRA ENTRE A XUNTA E O TSXG
O propio presidente da Xunta, Alfonso Rueda, queixouse o mes pasado de que vía "inédito" o paso de ir á xustiza europea sen ter en conta as "gravísimas consecuencias", en referencia á "total paralización" do sector. Tamén dicía de parécelle "moi curioso" e que lle chamaban "a atención" as decisións tomadas en relación a este asunto desde "a sala correspondente" do TSXG, tendo en conta que as previas foron "emendadas" polo Supremo cun fallo "claro" e "categórico", que se opta por "ignorar".
Todo iso nun contexto no que o esta Sala do TSXG leva suspendidos preto de 30 proxectos eólicos no que vai de ano. Tras a sentenza emitida polo Tribunal Supremo (TS) o pasado mes de decembro, o TSXG adaptou os criterios á hora de decidir sobre medidas cautelares respecto de parques, de modo que agora centra as súas paralizacións en cuestións ambientais.
