Mobilizacións do persoal de Ambulancias Casablanca contra os despedimentos efectuados na empresa

O persoal de Ambulancias Casablanca acordou iniciar mobilizacións contra despedimentos e a "deterioración" das condicións de traballo. Nun comunicado, a CIG denuncia incumprimentos das empresas e presións. Por iso, avisa que as protestas "finalizarán na convocatoria dunha folga", ademais de mobilizacións en toda a UTE, "se non se soluciona este conflito".

Ambulancias Casablanca forma parte dunha UTE con Ambulancias do Cantábrico (de HTC Group) e realiza o transporte sanitario non urxente da área sanitario de Santiago, dependente do Sergas.

Segundo explica o representante de FGAMT-CIG de Compostela, Inácio Pavón, denuncia que esta é unha das empresas do sector con peores condicións, que só se melloraron coa acción sindical. Pero "unha vez máis volven deixar de lado os acordos", o que leva ao persoal a "dicir que xa está ben".

A CIG advirte de que, ás portas dun novo concurso público, incúmprense acordos de contratación, referido a respectar antigüidades e cubrir postos fixos con traballadores indefinidos, e despídese a traballadores para "contratar outros aos que avisan que non deben falar coa representación sindical". "Mesmo hai sospeitas fundadas, e que serán postas en mans da fiscalía nos próximos días, de que se contratou a familiares sen titulación e que esta foi falsificada".

Protesta de traballadores do sector de ambulancias, en Santiago