O TC declara inconstitucional que despois de 15 anos as obras ilegais na costa galega se poidan regularizar
Declara nulos artigos sobre esta cuestión da lei de acompañamento aos orzamentos galegos para 2023.
Por Europa Press / Redacción | SANTIAGO DE COMPOSTELA | 08/05/2024 | Actualizada ás 16:08
O Pleno do Tribunal Constitucional (TC) declarou inconstitucionais e nulos os artigos da lei de acompañamento aos orzamentos galegos para 2023 que limitan a 15 anos o prazo de actuacións contra obras ilegais na costa. Deste xeito, estima o recurso de inconstitucionalidade promovido por Goberno central contra os artigos 10 e 11 e a disposición transitoria primeira da lei galega (Lei 7/2022, de 27 de decembro, de medidas fiscais e administrativas). A maxistrada Laura Díez Bueso foi a relatora.
O Consello de Ministros aprobou en setembro de 2023 presentar recurso de inconstitucionalidade contra estes artigos ao non alcanzarse acordo na Comisión Bilateral coa Xunta, que agora tomba o TC. En concreto, os artigos limitaban a un prazo de 15 anos o prazo de obrigación de restitución de obras ilegais en zona de dominio público marítimo-terrestre e abrían a porta á súa regularización tras ese período, o que choca coa lexislación estatal.
O artigo 10.1 reducía a 15 anos o prazo da Administración para impor a obrigación de restituír ao seu estado anterior obras e actuacións ilegais realizadas na zona de servidume de protección de costas. O motivo da declaración de inconstitucionalidade é que esta acción da Administración non está suxeita a ningún prazo na Lei de Costas.
O artigo 11 declárase inconstitucional por reproducir o contido do artigo 95.1 da Lei de Costas, sen cumprir cos requisitos esixidos para iso pola doutrina constitucional. A sentenza considera que a reprodución non tiña por finalidade facilitar a comprensión da lexislación autonómica de desenvolvemento e, ademais, introducía alteracións respecto do contido da lei estatal. Pola súa conexión con estes preceptos, a sentenza declara tamén inconstitucionais e nulos os artigos 10.1, parágrafo segundo, 10.2 e 10.3 e a disposición transitoria primeira.
Pola súa banda, o maxistrado Enrique Arnaldo Alcubilla anunciou a formulación dun voto particular a esta decisión do Tribunal Constitucional. Esta decisión chega despois da recente sentenza do Tribunal Constitucional (TC) que avala por unanimidade a lei galega de litoral despois de que o Goberno central presentase recurso contra diversos preceptos.
