O envío de SMS a sanitarios do Sergas anunciando aumentos de soldo a dous días das eleccións non será sancionado
Tras abrir procedemento en febreiro, a Xunta Electoral de Galicia rexeita sancionar ao non identificarse ao responsable da infracción en "unha concreta autoridade ou funcionario".
Por Europa Press / Redacción | SANTIAGO DE COMPOSTELA | 11/05/2024 | Actualizada ás 12:38
A Xunta Electoral de Galicia arquivou o procedemento sancionador aberto á Consellería de Sanidade por enviar a dous días das eleccións autonómicas do pasado 18 de febreiro mensaxes aos móbiles de traballadores do Servizo Galego de Saúde (Sergas) para informarlles de subidas salariais. Así figura na resolución do 29 de abril de 2024 da Xunta Electoral, que recolle Europa Press, unha decisión que tivo como instrutor a Antonio Martínez Quintanar, vogal da Xunta Electoral de Galicia.
Aínda que nun acordo anterior desta Xunta Electoral, de 21 de febreiro de 2024, valorábase que as mensaxes enviadas por Sanidade "tiñan unha connotación electoralista" porque "resulta obxectivamente innecesario e inoportuno transmitilas de modo individual no curso dun proceso electoral", agora o mesmo órgano asegura que "se aprecia unha connotación electoralista que xustificou" a apertura de expediente sancionador, pero "non concorren os orzamentos subxectivos necesarios para poder impor unha sanción".
Así, a Xunta Electoral afirma que a decisión de enviar ese SMS "non queda individualizada na específica conduta dunha concreta autoridade ou funcionario", de modo que "non queda xustificada no expediente a existencia dunha decisión específica, dunha concreta autoridade ou funcionario ordenando o envío do SMS cunha finalidade de interferir no proceso electoral". Argumenta o instrutor que "o expediente sancionador non se seguiu contra ningunha concreta autoridade ou funcionario, senón contra a Consellería de Sanidade, que, como tal, non pode ser considerado suxeito responsable da infracción para os efectos de recibir a imposición dunha sanción".
E defende que "estas consideracións non implican contradición co resolto anteriormente pola Xunta Electoral de Galicia", xa que "declarada a existencia de infracción e aberto o expediente sancionador, non necesariamente e de forma automática procede terminar este con unha resolución sancionadora", segundo reflicte, ao "non dirixirse o expediente contra unha concreta autoridade ou funcionario como responsable da infracción". No novo Goberno galego saído desas eleccións xa non figura o que era conselleiro de Sanidade, Julio García Comesaña, no momento dese SMS. Igualmente, relevouse á cúpula do Sergas cun novo conselleiro á fronte deste departamento, Antonio Gómez Caamaño.
ARGUMENTACIÓN
A Xunta Electoral tamén xustifica a súa decisión en que se trata de "unha canle de comunicación habitual do Sergas co seu persoal" en relación con "unha novidade de conceptos retributivos incorporada á nómina do mes de febreiro, que se realiza precisamente no momento no que se pecha a nómina, momento que determina que o persoal, con independencia do SMS denunciados, tería acceso ao contido desa nómina, que xa reflectía os conceptos retributivos aos que se referían o SMS".
A isto agrega que o envío de SMS polo Sergas aos seus traballadores "forma parte da dinámica habitual de relación deste organismo co seu persoal, segundo se deduce das alegacións formuladas pola Consellería de Sanidade". "Por tanto, non se trata dunha campaña específica que se organizase pola concorrencia do período electoral, senón dun medio habitualmente utilizado", sostén a Xunta Electoral. Ademais, indica que "non se trata dunha campaña de logros dirixida á cidadanía con carácter xeral, senón de mensaxes individualizadas ao persoal do Sergas".
POLÉMICOS SMS
O pasado 16 de febreiro, a 12 horas de que finalizase a campaña electoral, miles de traballadores do Sergas (incluídos os sanitarios en formación especializada) recibían SMS nos seus dispositivos móbiles que lles avisaban de que na nómina do mes de febreiro xa se lles abonaría o complemento de carreira profesional, así como o aumento do prezo das gardas e a aplicación do complemento de quendas, entre outros.
Tras estas mensaxes, BNG, Vox e Sumar puxeron senllas denuncias por entender que este envío a menos de 48 horas de que abrisen as urnas supuña unha "campaña de logros" prohibida expresamente pola lexislación electoral. Pola súa banda, a asesoría xurídica da Xunta xustificou que "o peche da nómina" realizouse o día anterior, 15 de febreiro, e que o "habitual" é que o Sergas comunique ao persoal a data efectiva destas melloras mediante SMS. Sanidade insistía en que o envío destas mensaxes ao persoal "non é unha novidade e utilízase habitualmente polo Sergas como medio de difundir información ou novidades". En 2023, remitíronse "preto de 200 comunicacións diferentes mediante SMS", recalcaba, para rexeitar que houbese unha infracción electoral.
Con respecto á carreira profesional, a Xunta argumentaba que estes abonos derivaban dunha convocatoria anual publicada no Diario Oficial de Galicia (DOG) do mes de agosto e que as solicitudes foron presentadas ata o 30 de setembro. De feito, o 26 de xaneiro deste ano, a administración informou de que xa estaban avaliadas as carreiras da "inmensa maioría" dos solicitantes. No tocante ás outras melloras retributivas, pactáronse cos sindicatos o 20 de abril de 2023 e aplicáronse en dúas quendas: unha primeira desde o 1 de xullo e outra desde o 1 de xaneiro de 2024, aínda que non serían de aplicación ata a nómina de febreiro.
