Empresas cubanas visitan Galicia para aumentar as relacións comerciais en agroalimentación e tecnoloxía

Unha delegación dunha decena de empresas cubas públicas e privadas visita Galicia en busca de "incrementar as relacións económicas" en sectores como a agroalimentación e a tecnoloxía. En declaracións á prensa antes de participar en Santiago de Compostela nun encontro coa patronal galega, o presidente da Cámara de Comercio de Cuba, Antonio Luís Carricarte, expuxo que "a economía cubana, a pesar das dificultades polas que atravesa, inicia un período de recuperación" que pasa por un aumento de turismo, impulso de pequena e mediana empresa público-privada, así como fomento de plataformas virtuais de venda.

No marco dunha viaxe que leva a esta delegación por lugares do norte de España como Santander, Guipúzcoa, Lugo, A Coruña e Santiago, Carricarte remarcou as "expectativas de incremento de niveis de negocio" das empresas españolas na illa, que se centran na propiedade de hoteis. Nesta liña, remarca que en Cuba "hai sangue galego" e "unha química" con Galicia para incrementar relacións económicas e comerciais. Respecto diso, o presidente da Confederación de Empresarios de Galicia (CEG), Juan Manuel Vieites, subliña a "oportunidade" que supón esta misión comercial dun país "estreitamente ligado" á comunidade galega. De tal forma, espera que "frutifiquen proxectos concretos".

Pola súa banda, a presidenta do Consello Galego de Cámaras, María Pais Fajín, valora que estas empresas cubanas teñen "moito que ofrecer en sectores que ata agora non eran moi coñecidos", situadas nun país cunha "posición xeoestratéxica clave". A Confederación de Empresarios de Galicia (CEG), xunto coa Confederación de Empresarios de Lugo (CEL) e a presidenta do Consello Galego de Cámaras, organizaron unha recepción a esta delegación de empresas de Cuba (misión inversa) na capital galega.

EXPORTACIÓNS E IMPORTACIÓNS

Galicia e Cuba mantiveron vínculos comerciais, especialmente en sectores como a pesca, a construción naval e a exportación de produtos agrícolas e téxtiles. Actualmente, a illa supón un mercado ínfimo para as empresas galegas, xa que dos máis de 30.000 millóns de euros aos que ascenderon as exportacións galegas o ano pasado, menos de 34,2 millóns tiveron como destino Cuba, o que se traduce no 0,1 % das vendas exteriores totais en 2023.

Pola súa banda, Galicia importou desde Cuba produtos por valor de 3,7 millóns de euros. Os números confirman que a balanza comercial coa illa ten superávit para Galicia. Galicia foi a sétima comunidade autónoma que máis produtos vendeu a Cuba o ano pasado, preto do 4 % do total das exportacións españolas, tamén a sétima comunidade cun maior incremento ese mesmo ano. Bens de equipo, automóbil e alimentación son os sectores que máis demanda Cuba de Galicia.

En 2023, á marxe dos produtos industriais e tecnolóxicos, os produtos agroalimentarios galegos con máis demanda en Cuba foron graxas e aceites (50 %), produtos lácteos (22 %), produtos pesqueiros (7 %) e produtos cárnicos (7 %). Á inversa, as importacións galegas procedentes de Cuba concentran principalmente produtos de alimentación (incluíndo tabaco e bebidas, como o ron) e materias primas.

Unha delegación de empresas cubanas visita Galicia para aumentar relacións comerciais en agroalimentación e tecnoloxía | Fonte: CEG