Pazos (PP), Pontón (BNG) e Besteiro (PSdeG), elixidos para presentar no Congreso a lei de traspaso da AP-9
Terá lugar o próximo 11 de xuño.
Por Europa Press / Redacción | SANTIAGO DE COMPOSTELA | 29/05/2024 | Actualizada ás 12:21
O Parlamento galego escolleu este mércores aos portavoces de PP, BNG e PSdeG, Alberto Pazos Couñago, Ana Pontón e José Ramón Gómez Besteiro, respectivamente, para acudir ao Congreso dos Deputados o próximo 11 de xuño a defender a lei de transferencia da titularidade da AP-9 a Galicia.
Será a cuarta vez en sete anos que se tramite en Madrid esta norma que parte da Cámara autonómica. Para ese efecto, este mércores elixiuse por votación en urna a Pazos Couñago (38 votos, xa que faltaban dous deputados populares), Pontón (26 votos, ao sumar os 25 do Bloque e, presumiblemente, o do deputado de Democracia Ourensá, Armando Ojea) e Gómez Besteiro (9 votos, todo o grupo do PSdeG).
Ao comunicar o resultado da votación, o presidente do Parlamento, Miguel Santalices, desexou "moita sorte" ao tres portavoces e chanceou con que, se volven "co obxectivo cumprido" de transferir a titularidade da AP-9, vai a Padornelo para saudalos e recibilos "se é necesario".
E é que en decembro de 2023, por cuarta ocasión en sete anos, o Parlamento de Galicia aprobou por unanimidade --esta vez promovido polo PP-- o texto lexislativo para a súa remisión ao Congreso co obxectivo de conseguir este traspaso. Desde 2016, os diferentes acordos na Cámara galega non frutificaron polo fracaso das leis na súa tramitación nas Cortes Xerais.
A demanda para que a xestión da autoestrada que vertebra a fachada atlántica galega volve saír do Pazo do Hórreo rumbo a Madrid, onde chegará de novo cunha serie de demandas en materia económica ao Estado como principais novidades.
Entre esta figura unha mención a que será a Administración do Estado quen asuma as posibles consecuencias económicas que deriven dunha hipotética anulación da prórroga da concesión a Audasa ata 2028, asunto que está en estudo pola xustiza europea por unha posible infracción da normativa comunitaria en materia de competencia.
Esta cuestión foi incorporada durante o proceso de tramitación na Cámara galega a través dunha emenda do BNG que foi aceptada para a súa inclusión no ditame final polo PP. Esta foi a única achega ao texto orixinal presentado polos populares, que engadiron unha serie de obrigacións a facer fronte por parte do Estado en asuntos como a extensión das bonificacións das peaxes ou a execución de obras de remodelación ou ampliación da infraestrutura.
