Formación de persoal para fortalecer a loita contra os incendios forestais en condicións de vento

A Consellería do Medio Rural, a través da Dirección Xeral de Defensa do Monte, concluíu unha acción formativa dirixida a brigadas de bombeiros forestais sobre o manexo de lume técnico no Centro Integral de Loita contra o Lume de Toén (CILL). Estes cursos son impartidos por persoal do Servizo de Prevención e defensa contra os Incendios Forestais (SPIF) e xa contan con varias edicións ás súas costas, apunta a Xunta, centradas en aspectos como o manexo da auga, a arquitectura táctica dos lumes ou a seguridade nas operacións.

A formación, que comezou no mes de abril e terminou na última semana de maio, dividiuse en xornadas en liña enfocadas no manexo do lume técnico en todas as súas variantes e en sesións teórico-prácticas. Durante a parte teórica, analizáronse lumes de todas as partes do mundo, incluída Galicia, onde se buscan patróns comúns de comportamento e estúdanse as fortalezas de actuación. Nunha segunda fase centráronse na especialización en lumes de vento, profundando no factor humano e na mellora da capacidade de toma de decisións co fin de adecuar a resposta do SPIF ante situacións complexas, baseándose nunha idónea lectura destas situacións.

Medio Rural aposta pola formación de persoal para fortalecer a loita contra os incendios forestais | Fonte: XUNTA