A Mesa acusa á Xunta e Estado de "negar" o dereito a expresarse en galego

Unha trintena de persoas arroupou este luns nos xulgados de Santiago ao home multado por esixir ser atendido en galego nun ambulatorio de Rianxo, unha sanción recorrida pola vía xudicial e que para A Mesa pola Normalización Lingüística representa un exemplo da "clara conivencia" que existe entre a Xunta e o Estado para "negar sistematicamente" o dereito a comunicarse coa adminstración na lingua propia de Galicia e "amedrentar" a quen demanda o cumprimento dos seus dereitos en materia lingüística.

Os xulgados da capital galega celebraron este luns a vista xudicial polo recurso presentado por Xosé Agrelo contra a multa de 600 euros que lle foi imposta por demandar nun centro de saúde de Rianxo que se lle atendese en galego durante un cribado de covid-19.

A sanción chega aos xulgados despois de esgotar a vía administrativa, na que a Subdelegación do Goberno alegou que a multa --xa abonada, pero que a defensa (custeada pola Mesa) pide que sexa revogada-- respondía a un asunto de "orde pública" denunciado pola Policía Local e que, por tanto, estaba desvinculado de calquera cuestión lingüística.

Antes de entrar á celebración da vista, Agrelo agradeceu o apoio das persoas convocadas pola Mesa pola Normalización Lingüística, cuxo presidente, Marcos Maceira, denunciou ante os medios que no caso de Rianxo "conflúen" a "negativa" das administracións a velar polos dereitos lingüísticos da cidadanía e a "actitude" de Xunta e Estado de "amedrentar" ás persoas "que queren usar o galego nos servizos públicos".

Concentración ante os xulgados de Santiago pola celebración dun xuízo contra unha persoa multada por esixir ser atendida en galego nun ambulatorio de Rianxo | Fonte: Europa Press

"DIGNIDADE"

Por unha banda, Maceira asegurou que a Xunta "aínda segue negando a través dos funcionarios o dereito a usar o galego na propia administración autonómica", ao que se suma a "clara connviencia" que, di, existe entre o Goberno galego e o central para "presionar" ás persoas que esixen "con toda a dignidade" o cumprimento das normativas que amparan o dereito de ser atendidos en galego polos funcionarios.

"Non imos consentir todo isto. Poden ir tomando nota o señor (Alfonso) Rueda, o conselleiro de Cultura e Lingua, o delegado do Goberno e o ministro do Interior", aseverou o presidente da Mesa, que subliñou o compromiso de "resposta" ante "todos os casos que haxa de represión en pleno ano 2024 polo simple feito de usar o galego".

Maceira sinalou que "recentemente" se produciu outro caso dunha persoa que "tivo un incidente" na comisaría de Polícia de Pontevedra por cuestións lingüísticas e que no mes de xullo terá lugar un xuízo pola vía penal en Ourense contra un grupo de persoas "que están acusadas de defender a normativa vixente en relación á toponimia". "Temos unha lingua propia e queremos vivir nela. Este é un dereito humano recoñecido a todos os niveis, que o Estado Español e a Xunta de Galicia deben garantir sempre e en todo lugar", concluíu Maceira.