O socialista galego César Mogo defenderá no Senado o apoio ao recoñecemento de Palestina como Estado

O portavoz adxunto do PSOE na Cámara Alta e senador por Lugo, César Mogo, defenderá o martes na Comisión de Asuntos Exteriores unha moción na que pedirá ao Senado que recoñeza a Palestina como Estado, na liña da acción diplomática emprendida polo presidente do Goberno, Pedro Sánchez.

César Mogo explicou que o Grupo Socialista quere que o Senado se una á decisión do Goberno máis trascedente en materia de política exterior das últimas décadas, expresando o seu respaldo político ao recoñecemento do Estado de Palestina, e engadiu que "a xustiza e a pz son sinais deste recoñecemento exemplar".

Na mesma moción, os socialistas expresan o seu "máis contundente condena" aos atentados terroristas perpetrados por Hamás o pasado 7 de outubro e esixen a liberación inmediata das persoas secuestradas. Ademais, manifestan o seu rexeitamento "ás operacións militares que se están levando a cabo en Gaza e que están a cobrar miles de vidas, e reivindican a vixencia do dereito internacional humanitario".

Os senadores socialistas expresan o seu apoio aos esforzos encamiñados á procura dunha saída pacífica ao conflito, que debe pasar necesariamente polo alto ao lume, a apertura dun proceso de diálogo e o recoñecemento dos dous estados.

Por último, apoian as xestións emprendidas polo secretario xeral da ONU para pór fin ao conflito e secundan a proposta do Goberno para a negociación, o entendemento e a materialización da solución dos dous estados.

O senador do PSdeG César Mogo. PSDEG | Fonte: Europa Press