O cáliz, a estrela, o corno e os montes sacros de Galicia; así é a Doutrina do Sancto Graal de Vicente Risco

En 1914, Vicente Risco asistiu en Madrid á representación de Parsifal de Wagner, unha obra cargada de inspiración celto-cristiá. Esta experiencia marcou profundamente a Risco e levouno a crear o borrador da Doutrina do Sancto Graal. A obra reivindica simbolismos como o cáliz, a estrela, o corno e os montes sacros de Galicia, imbuíndoos dun realismo máxico que caracteriza a creatividade daquela época. Felipe-Senén López Gómez realizou un minucioso estudo, transcrición e notas dos textos orixinais de Risco para esta edición.

Vicente Risco | Fonte: Fundación Vicente Risco

 

 

 

 

Ver esta publicación en Instagram

 

 

 

 

 

 

 

 

 

 

 

Una publicación compartida de Fundación (@fvicenterisco)

O vindeiro venres 7 de xuño, ás 20 horas, a sede da Fundación Vicente Risco en Allariz será o escenario da presentación do libro "Doutrina e Ritual da Moi Nobre Orde Galega do Sancto Graal. A Estrela do Apóstolo", unha obra do recoñecido autor galego Vicente Risco. No evento, participarán Celia Pereira Porto, presidenta da Fundación Vicente Risco, e Felipe-Senén López Gómez, arqueólogo e responsable da edición, estudo e notas desta nova publicación.

En 1914, Vicente Risco asistiu en Madrid á representación de Parsifal de Wagner, unha obra cargada de inspiración celto-cristiá. Esta experiencia marcou profundamente a Risco e levouno a crear o borrador da Doutrina do Sancto Graal. A obra reivindica simbolismos como o cáliz, a estrela, o corno e os montes sacros de Galicia, imbuíndoos dun realismo máxico que caracteriza a creatividade daquela época. Felipe-Senén López Gómez realizou un minucioso estudo, transcrición e notas dos textos orixinais de Risco para esta edición.

EDICIÓN POR FELIPE-SENÉN

Celia Pereira Porto destacou a importancia deste evento e o labor de edición realizada por Felipe-Senén. "No acto preséntase unha nova edición que acaba de sacar Galaxia dos dous textos mencionados. Felipe-Senén fixo un gran labor de edición e contexto. É un traballo extenso e intenso, que se estivo desenvolvendo durante aproximadamente dous anos. O acto propiamente é para presentar o libro ao público xeral, como unha estrea, a primeira vez que se vai a falar del. É un libro que entra polos ollos, é un agasallo para aquelas persoas que aínda aman ter os libros en papel e non todo en formato electrónico. Ademais, está actualizado ao noso contexto actual", explicou Pereira Porto.

A presidenta da Fundación tamén subliñou o orgullo que supón rescatar e recoñecer o valor das obras culturais propias. "O libro é un orgullo, rescatar as nosas cousas, recoñecer o valor que teñen e dalas a coñecer. É fundamental compartir a nosa cultura e que non quede esquecida. Ás veces dámoslle moito valor ás obras que veñen de fóra e non nos fixamos nas que temos aquí. Non as valoramos, e iso é un erro. Debemos relacionarnos con outras culturas en posición de igualdade, coñecendo o valor real do noso, como facía a Xeración Nós", engadiu Pereira Porto.

Este evento non só é unha oportunidade para os amantes da literatura e a cultura galega de redescubrir unha obra fundamental, senón tamén unha chamada para valorar e difundir o patrimonio cultural propio. A presentación promete ser unha velada de gran interese para todos aqueles que buscan profundar nas raíces culturais de Galicia e apreciar o legado de Vicente Risco na súa xusta medida.