O TSXG desestima un recurso contra a Xunta interposto por unha conductora, "a causa principal era a velocidade inadecuada"

O Tribunal Superior de Xustiza de Galicia (TSXG) desestimou un recurso contencioso-administrativo interposto por unha condutora contra á Consellería de Infraestruturas e Mobilidade da Xunta de Galicia tras sufrir un accidente nunha estrada en mal estado. En concreto, a sección segunda da Sala do Contencioso-Administrativo do TSXG desestimou o recurso contra a desestimación por silencio administrativo dimanante da Consellería ante a reclamación presentada pola condutora en xaneiro de 2022, ao considerar que a principal causa do sinistro foi a "velocidade inadecuada" da muller e non o estado da vía.

Os feitos ocorreron en maio de 2021, cando a demandante circulaba na súa motocicleta pola estrada autonómica AC-840, ao seu paso por Oza-Cesuras. Nunha zona de curvas, perdeu a tracción na roda traseira, o que motivou a súa caída, chocando contra a barreira metálica semirrígida de protección. No ateigado da Garda Civil recollíase que a "causa principal do accidente" foi a "velocidade inadecuada" por parte da condutora, aínda que tamén se explicaba que a vía fora reparada mediante parches de asfalto.

Na sentenza, os xuíces consideran como "causa mediante" o estado da vía, xa que a súa reparación tiña parches de asfalto, "cuxas xuntas de unión ao estar molladas provocan a perda de adherencia". Pero a "causa principal" do accidente era a "velocidade inadecuada" da condutora. A pesar de que a muller solicitaba máis de 35.000 euros de indemnización, finalmente o TSXG desestimou o seu recurso. Con todo, a sentenza non é firme. Contra ela pode interporse recurso.

Transportes formaliza por máis de 12 millóns de euros un contrato de conservación de estradas en Ourense. | Fonte: MINISTERIO DE TRANSPORTES