9X.- Así votaron os líderes: Rueda celebra que a votación se desenvolve "con normalidade"

O presidente da Xunta e do PPdeG, Alfonso Rueda, votou este domingo en Pontevedra e celebrou que a xornada de eleccións europeas se desenvolvan "con normalidade". Así, chamou aos galegos a "dedicar 10, 15 minutos" en exercer este dereito porque non só Europa, senón "tamén España e Galicia xóganse moitísimo".

Así se expresou o presidente galego despois de acudir, ao redor das 11.30 horas, a votar ao colexio electoral localizado no Centro Galego de Tecnificación Deportiva, na cidade do Lérez. Estivo acompañado da súa familia, así como dos candidatos da lista do PP para as europeas Francisco Millán Mon e Adrián Vázquez.

O máximo mandatario dos populares galegos insistiu en que participar nas eleccións ao Parlamento Europeo é "moi importante". Neste contexto, Alfonso Rueda desexou que a xornada se siga desenvolvendo "con toda normalidade", á vez que agradeceu o labor dos interventores e apoderados de "todos os partidos", pero en especial aos "máis de 9.000" que ten o PP. Tamén estendeu este agradecemento a todos os cidadáns que teñen que estar este domingo en mesa electoral.

O presidente da Xunta manifestou que aproveitará, como "sempre", para pasar o día en Pontevedra, a súa cidade, "percorrer algún colexio electoral" e estar "un pouquiño coa familia" polo mediodía. Xa pola tarde, Rueda prevé desprazarse ata Santiago, á sede do PPdeG, para seguir o escrutinio, que nesta ocasión "é un pouco peculiar" porque ata as 23.00 da noite non vai haber datos.

ANA PONTÓN, ESPERA UNHA "IMPORTANTE MOBILIZACIÓN"

A portavoz nacional do BNG, Ana Pontón, dixo que espera unha "importante mobilización" este domingo de eleccións europeas, á vez que apelou a toda a cidadanía a "decidir que Galicia en Europa quere". En declaracións aos medios tras votar no Centro Galego de Arte Contemporánea (CGAC) de Santiago sobre as 10.30 horas, a líder nacionalista manifestou que exerceu este dereito "con toda a ilusión" e coa "convicción" de que Galicia se xoga "moito en Europa".

"Hoxe é un día para reclamar que a cidadanía vote. Que os galegos e galegas voten pensando en quen pode defender mellor os seus intereses en Europa. Que voten pensando no que nos estamos xogando neste momento e que utilicen o poder que lle dá o voto para decidir que Galicia en Europa queren e tamén que modelo de Europa desexan para o futuro", explicou.

Pontón, acompañada da alcaldesa de Santiago, Goretti Sanmartín, e do deputado do BNG no Congreso, Néstor Rego, entre outros, desexou unha "participación relevante" e "importante" nos comicios comunitarios.

Así, a portavoz nacional do Bloque --que acode a estas eleccións na coaliación Agora Repúblicas-- lembrou que o voto é "un dereito" que custou "moito tempo conquistar" e insistiu na idea do "importante" que é decidir "cal é o papel" tanto de Galicia en Europa como da propia Europa "no mundo".

BESTEIRO, O MÁIS MADRUGADOR

O secretario xeral do PSdeG, José Ramón Gómez Besteiro, foi o líder político galego máis madrugador e acudiu ao seu colexio electoral en Lugo sobre as 9.30 horas da mañá deste domingo. Tras exercer o seu dereito a voto, apelou á cidadanía a participar nos comicios europeos. "Votar por Europa é votar por nós", dixo, en declaracións aos medios, tras depositar a papeleta nunha das urnas do CEIP Rosalía de Castro de Lugo.

O líder dos socialistas galegos lanzou unha mensaxe clara pola participación: "É moi importante, porque Europa está moi presente nas nosas vidas e o que pase en Europa aféctanos directamente". Afirmou: "Así que ánimo, a votar por unha Europa forte fronte a quen pretende destruíla", insistiu Besteiro.

MIGUEL TELLADO CHAMA A PARTICIPAR

O portavoz do PP no Congreso, Miguel Tellado, acudiu a votar este domingo ao seu colexio electoral en Ferrol, desde onde chamou a "todo o mundo" a participar nos comicios ao Parlamento Europeo e decidir "o futuro que queren para España e para Europa". Así se pronunciou Tellado ante os medios tras depositar a súa papeleta no CEIP Cruceiro de Canido, onde estivo acompañado do alcalde de Ferrol, José Manuel Rey Varela.

O portavoz dos populares na Cámara Baixa criticou que "algúns" se pasasen "toda a campaña electoral pedindo á xente que non participase". Fronte a eles, chamou a "que vote todo o mundo, que voten o que queiran, pero que voten".

E é que, tal e como asegurou Miguel Tellado, o que sucede en Europa "non é alleo" e "afecta no día a día ás vidas de todos". "Europa está moito máis preto do que os españois cremos e por tanto o que esperamos desde o PP é que haxa unha gran participación, que os cidadáns acudan ás urnas, que voten de forma masiva e que decidan libremente o futuro que queren para España e para Europa", subliñou.