Abanca recoñece a contribución dos seus antigos empregados no seu décimo aniversario
"Sabemos que non chegariamos ata aquí sen vós, sen todo o que fixestes nos vosos anos de servizo e dedicación dando un exemplo de implicación, profesionalidade e fidelidade" destacou o presidente de Abanca, Juan Carlos Escotet
Por Europa Press / Redacción | SANTIAGO DE COMPOSTELA | 26/06/2024 | Actualizada ás 19:55
O presidente de Abanca, Juan Carlos Escotet, e o conselleiro delegado, Francisco Botas, mantiveron un encontro en Santiago cunha representación de antigos empregados do banco e das súas entidades de orixe, un colectivo de preto de 3.600 persoas.
A cita, celebrada no Centro Abanca Obra Social, forma parte dos actos de celebración do 10 Aniversario da entidade. Busca "recoñecer a contribución dos antigos empregados e empregadas aos éxitos logrados pola entidade desde o seu lanzamento en 2014", informa Abanca nun comunicado.
"Sabemos que non chegariamos ata aquí sen vós, sen todo o que fixestes nos vosos anos de servizo e dedicación dando un exemplo de implicación, profesionalidade e fidelidade. O noso traballo neste dez anos estivo dirixido a facer honra ao voso legado como profesionais", trasladoulles Juan Carlos Escotet.
"Moitos clientes séguenvos lembrando e valorando como referencia: para eles seguides sendo parte desta entidade e para nós tamén. Acompañástesnos neste dez anos e estamos seguros de que o seguiredes facendo no desenvolvemento do noso proxecto para seguir crecendo e mellorando", afirma Francisco Botas.
