Así contrataba o alcalde de Porto do Son: elixía a xente "de forma verbal e directa" e sen formalizar contrato

O alcalde de Porto do Son, Luís Oujo (PPdeG), enfróntase a unha petición de "inhabilitación" por unha presunta prevaricación en relación á contratación dunha arquitecta técnica. No xuízo que se celebra este martes, mércores e xoves na Audiencia Provincial da Coruña, é a solicitude que formulou a acusación popular fronte ao sobresemento que pide a Fiscalía.

Durante a vista, a arquitecta técnica explicou que en 2011 o municipio de Porto do Son fíxolle un contrato de seis meses "por decreto" e relatou que continuou traballando para o mesmo ata 2016 sen formalizar "ningún tipo de prórroga" senón que adxudicado "de maneira verbal e directa". "Todas as obras do Concello eran dirixidas por min, nunhas asinaba e noutras non", concretou.

A este respecto, tanto a interventora como o secretario municipal apuntaron a "irregularidades" na súa contratación. "O expediente administrativo polas miñas mans non pasou, non sei se había algún documento informal", sinalou a interventora na súa declaración. Ambos coincidiron en que os contratos menores "non poden prorrogarse" e as contratacións verbais "non están permitidas". No entanto, asegurou que é unha "situación moi frecuente, desafortunadamente común, que aínda pervive nalgún concello".

FEITOS

Segundo apunta o escrito fiscal, o feitos obxecto de xuízo ocorreron en 2011, cando Oujo entrou a gobernar, e o Concello contratou a unha arquitecta técnica por un ano e o contrato foise alongando, para o que a Administración local tivo que levantar diferentes reparos.

Está previsto que o acusado declare o xoves, día 4, tras a petición da súa defensa de comparecer ao final da práctica da proba, solicitude aceptada polo tribunal.

O alcalde de Porto do Son, José Luís Oujo, coa conselleira de Medio Ambiente, Ángeleos Vázquez. XUNTA