O castelo de San Felipe albergará o 9 e 10 de agosto catro concertos do Festival Mar Aberto
As entradas, que son gratuítas, poden reservarse a partir deste xoves.
Por Europa Press / Redacción | FERROL | 03/07/2024 | Actualizada ás 18:00
A Sala Curuxeiras do Porto de Ferrol acolleu na mañá deste mércores o acto de presentación dos concertos que terán lugar no castelo de San Felipe o venres 9 e o sábado 10 de agosto no marco do Festival Mar Aberto, que as fins de semana anteriores fará escala en Ribeira e Muxía. No acto estivo presente o director de Turismo de Galicia, Xosé Manuel Merelles; o alcalde de Ferrol, José Manuel Rey Varela; e a delegada territorial da Xunta, Martina Aneiros.
Esta cita que busca como escenarios lugares "incomparables" como a fortaleza da ría, incluirá na súa programación en Ferrol as actuacións da artista peruana Pamela Rodríguez e a banda Juno, de Zahara e Martí Perarnau, que tocarán o venres 9, a partir das 20.45 horas. Ao día seguinte, será a quenda da artista galego-brasileira Lúa de Santana e a andaluza María José Llergo.
Desde a organización adiantouse, ademais, que se porá a disposición dos asistentes un servizo de autobús e outro de lancha ata o castelo. As entradas, que son gratuítas para todos os concertos, poden reservarse a partir deste xoves na páxina web www.festivalmaraberto.com.
