Detido o suposto autor dos incendios en colectores de Pontevedra e nunha vivenda e un garaxe de Marín
Un home foi interceptado e detido como presunto autor dun delito continuado de danos mediante incendio, que puxo en grave risco a integridade física das persoas e supuxo tamén un prexuízo económico.
Por Europa Press / Redacción | PONTEVEDRA | 05/07/2024 | Actualizada ás 17:06
A Policía Nacional detivo a un home como presunto responsable dun delito continuado de danos, por varios incendios en colectores da cidade de Pontevedra e nunha vivenda e nun garaxe en Marín. Todo empezou o 24 de maio, día no que se produciu un incendio nunha casa dunha barriada de Marín. Esa mesma madrugada, orixinouse outro lume nun garaxe dun edificio que afectou a numerosos coches e obrigou ao desaloxo dos residentes.
Días despois, na madrugada do 6 de xuño, na cidade de Pontevedra incendiáronse seis colectores de residuos urbanos e unha autocaravana que quedaron completamente calcinados. Así, a Policía Nacional activou un dispositivo especial de prevención mentres se continuaba cos labores de investigación e estudo dos indicios. Os axentes estableceron un operativo ao redor da casa do sospeitoso, que foi interceptado cando tentaba abandonala.
Nese momento, foi interceptado e detido como presunto autor dun delito continuado de danos mediante incendio, que puxo en grave risco a integridade física das persoas e supuxo tamén un prexuízo económico. Ademais, a Policía recuperou no seu domicilio unha bicicleta que fora subtraída no garaxe incendiado. Unha vez na comisaría da Policía Nacional de Marín, tramitáronse as correspondentes dilixencias que foron remitidas xunto co detido ao Xulgado de Instrución número 2, en funcións de garda.
