Sae a consulta pública a futura lei galega de intelixencia artificial, que irá en setembro ao Parlamento
Incluirá medidas para "dar seguridade" á cidadanía e axudas a empresas para que a implementen.
Por Europa Press / Redacción | SANTIAGO DE COMPOSTELA | 08/07/2024 | Actualizada ás 17:18
A Xunta aprobou sacar a consulta pública o anteproxecto de lei galega que regulará a intelixencia artificial (IA), coa idea de que no mes de setembro poida ser remitido ao Parlamento para a súa aprobación final. Na súa comparecencia tras a reunión semanal do Executivo autonómico, o presidente, Alfonso Rueda, reivindicou que Galicia será a "primeira comunidade" en regular a IA cunha norma propia.
O principal obxectivo, xa anunciado en novembro de 2023 cando a Xunta empezou a elaborar o anteproxecto, é "dar seguridade" á cidadanía cun "uso seguro e ético", ademais de "atraer investimentos" á Comunidade vinculados a este campo tecnolóxico. Neste sentido, a lei apostará por impulsar o emprego da IA na Administración, pero quedará "garantida sempre a supervisión humana" por parte do seu persoal.
Ademais, o texto blindará que os cidadáns "estarán sempre informados" sobre que procesos e tramitacións utilizan a intelixencia artificial. Para iso, crearase unha oficina específica e un rexistro con todos os sistemas da Administración autonómica que funcionan con ela.
A futura lei tamén prevé a creación dun Consello Galego de IA, un foro estratéxico de participación, consulta e asesoramento na materia que estará formado por membros da Administración, das universidades, os colexios profesionais e o sector tecnolóxico.
AXUDAS AO TECIDO PRODUTIVO
En clave económica, a lei recollerá medidas como subvencións por parte da Xunta para que empresas galegas aposten pola implementación desta tecnoloxía nos seus procesos produtivos.
Con esta mesma intención, impulsarase a captación de investimentos, deseñaranse "programas de aceleración" da implementación da intelixencia artificial en "sectores emerxentes" da economía, á vez que se poderán declarar como de interese autonómicos os proxectos de IA que se adecúen ao desenvolvemento rexional.
