Uns premios da Universidade Intercontinental da Empresa e a RAGC recoñecerán á mocidade investigadora
Estarán dotados con 5.000 euros e cubrirán as áreas de ciencias sociais, básicas e técnicas.
Por Europa Press / Redacción | SANTIAGO DE COMPOSTELA | 10/07/2024 | Actualizada ás 15:35
A Universidade Intercontinental da Empresa (UIE) e a Real Academia Galega de Ciencias (RAGC) porán en marcha os Premios de Investigación UIE-RAGC co obxectivo de recoñecer o talento da mocidade investigadora de Galicia. En concreto, estes galardóns para terán periodicidade bienal e recoñecerán o esforzo que desenvolve a mocidade investigadora nos centros galegos e que contribúe co seu esforzo ao avance do coñecemento científico.
Ambas as entidades selaron este mércores un acordo de colaboración nun acto ao que asistiron o reitor da UIE, Miguel Ángel Escotet; e o presidente da Real Academia Galega de Ciencias, Juan Manuel Lema Rodicio.
En palabras do reitor da Universidade Intercontinental da Empresa, Miguel Ángel Escotet, "é moi importante sinalar o compromiso da UIE coa investigación básica e aplicada, e, especialmente, cos mozos investigadores". "Formación, investigación e servizo social e cultural á comunidade son obxectivos que están insertos no noso ADN", dixo para subliñar o compromiso da universidade coa dinamización do saber que se ve materializado cun certame enfocado ao recoñecemento público das traxectorias investigadoras.
O reitor, que destacou este labor investigador como un impulso do coñecemento científico que serve de motor indispensable do progreso social, avanzou que o próximo ano académico a entidade continuará, "paso a paso" e "con prudencia", os seus programas de doutoramento vinculados intimamente coa investigación.
Pola súa banda, o presidente da Real Academia Galega de Ciencias, Juan Manuel Lema Rodicio, salientou que con estes premios pretenden pór en valor e dar ánimos a todas aquelas investigadoras e investigadores que se atopan nos comezos da súa carreira, aínda que xa desenvolvida, pero na primeira etapa, e para que poidan centrarse en abordar un proxecto ambicioso mentres contan co recoñecemento que todo galardón implica. E, para iso, sostivo que a colaboración da UIE é fundamental porque se trata dunha universidade que aposta pola calidade e a xente nova, e isto é o que necesitamos impulsar.
DOTACIÓN
Os premios terán unha dotación de 5.000 euros por cada rama de coñecemento de ciencias sociais, básicas e técnicas. Dentro do campo das ciencias básicas, concederase pola contribución da investigación ao desenvolvemento da ciencia básica en Galicia en calquera dos campos da física, a química, as matemáticas e a bioloxía.
Concederase pola contribución da investigación ao desenvolvemento das ciencias sociais en Galicia en calquera dos campos da economía, a socioloxía, a antropoloxía social e a psicoloxía social. Por último, na rama das ciencias técnicas, outorgarase pola contribución da investigación ao de desenvolvemento tecnolóxico en calquera das súas áreas, valorando o grao de innovación e a súa aplicabilidade.
As persoas que poden concorrer aos Premios de Investigación UIE-RAGC para Mozas Investigadoras e Investigadores deben ser menores de 40 anos (ampliados a 42 en casos debidamente acreditados, recolleitos e detallados nas bases) e precisarán contar cunha destacada contribución á creación do coñecemento, na que se valorará especialmente a calidade, a orixinalidade e o impacto resultante.
Así mesmo, serán criterios puntuables a internacionalización, a capacidade de liderado, a capacidade formativa avaliada e a habilidade para a divulgación para o conxunto da sociedade do coñecemento científico.
