Temas: SEAFEST PEIXE ESPADA TAPAS VIGO MAR COMIDA PEIXE MARISQUEO PESCADA FESTIVAL PREMIO BACALLAU AMEIXAS EVENTO SARDIñA

(Vídeo) O Seafest: un festival no que degustar produtos do mar dun xeito diferente

O festival pechou as súas portas o domingo coa entrega do premio á mellor tapa: 'A Espadarra', unha creación do restaurante El Juliana que incluía sardiña mariñada, tomate negro e lima. O GC amósache como foi!

Por Ángela Precedo | VIGO | 15/07/2024 | Actualizada ás 21:00

Como cada ano o Seafest acolleu na explanada do Náutico de Vigo a centos de persoas durante os seus catro días de duración, dende o xoves 11 ata o domingo 14 de xullo. Trátase dun festival gastronómico no que os visitantes poden degustar produtos do mar de xeito diferente, presentados en tapas xenerosas e singulares que non deixan indiferente a ninguén, elaboradas por algúns dos mellores chefs da cidade. Á comida hai que sumar os concertos e actividades gratuítas para toda a familia. O Galicia Confidencial pasa un día neste evento para contarvos como é.

En verdade trátase dun concepto de festival totalmente diferente. Os visitantes poden entrar gratuítamente e desfrutar dos concertos que durante todo o día amenizan o ambiente, sen ter que pagar nin un euro. Logo, e como algo opcional, poden dirixirse a algunhas das casetas nas que se preparan as diferentes tapas para pedir unha por un prezo reducido: 5 euros. Unha vez degustada, poden votar se lles gustou ou non e entrar no sorteo de múltiples agasallos. Nesta edición había ata 14 propostas diferentes que pasaban polo peixe espada, a pescada, o bacallau, o calamar, a sardiña, o peixe sapo e ata o bogavante.

Como se trata dun festival de día ao que asisten moitas familias, entre a oferta de actividades tamén había moitas propostas para os máis pequenos, coma un obradoiro de cociña infantil ou un obradoiro de marisqueo no que os rapaces aprenderon como se sementan e se recollen as ameixas e cal é o talle comercial que deben ter para poder venderse. Tamén contaban con espazos nos que podían deixar voar a súa imaxinación creando peixiños de papel e decorando un mural do que colgaban redes de pesca.

Os xardíns de Edualyen, nos que se colocaron varias ducias de bancos e mesas para os comensais, foron o espazo de recreo perfecto para os visitantes, pois puideron refuxiarse durante as horas de sol baixo as súas árbores. O festival pechou as súas portas o domingo coa entrega do premio á mellor tapa: 'A Espadarra', unha creación do restaurante El Juliana que incluía sardiña mariñada, tomate negro e lima.