Confrarías de Pontevedra rexeitan a Comisión Mar-Industria da CEG e urxen unha reunión da Federación Galega

A Federación Provincial de Confrarías de Pescadores de Pontevedra solicitou a convocatoria urxente dunha reunión dos depósitos de marisqueo no ámbito da Federación Galega para analizar e acordar unha posición común tras a solicitude da Comisión Mar-Industria da Confederación de Empresarios de Galicia (CEG) de crear mesas técnicas de traballo para a mellora da xestión do marisqueo. "Pretenden erixirse nos representantes do sector do marisqueo e decidir xunto coa Consellería do Mar as medidas e actuacións que melloren a xestión e a produción dos bancos marisqueiros", critica.

Así, os pescadores pontevedreses móstranse "sorprendidos" de que unha "teórica" Comisión Mar-Industria non conte entre os seus integrantes con ningún representante da actividade extractiva da pesca de baixura, de altura e do marisqueo, nin tampouco, segundo expón a Federación provincial nunha nota de prensa, estean representadas outras organizacións asociativas relevantes do complexo mar-industria (Anfaco, Conxemar, Arvi ou o Consello Regulador Mexillón de Galicia, entre outras).

Con todo, afirma, si forman parte dela representantes dalgunhas entidades bancarias, de empresas do sector enerxético, da distribución alimentaria, algún bateeiro ou o presidente de Agade. Para os pescadores pontevedreses, resulta relevante "o repentino interese destes axentes sociais pola situación do marisqueo e o seu actual problemática".

Pescadores descargan o peixe e o marisco capturado no Porto de Burela, a 21 de decembro de 2022 | Fonte: Carlos Castro