O Foro Galego de Inmigración denuncia irregularidades no programa de emprego para emigrantes retornados de 2023

O Foro Galego de Inmigración remitiu un escrito ao conselleiro de Emprego, Comercio e Emigración, José González, para pedir melloras no seu programa de emprego para favorecer o regreso de galegos no exterior, o Retorna Cualifica Emprego, ao asegurar que na edición de 2023 quedaron "decenas de persoas en situación de desamparo". Nun comunicado remitido aos medios, o foro sinala que, ante o anuncio dunha nova edición deste programa, a Consellería de Emprego debe corrixir o que cualifican de "graves irregularidades" no desenvolvemento desta iniciativa durante a súa edición de 2023.

O Foro considera que o novo programa debe garantir a firma de contratos de traballo indefinido antes de producirse o desprazamento persoal ou familiar a Galicia. E é que a entidade sinala que na anterior edición asinábase "un precontrato laboral, que despois en decenas de casos, non se plasmou nun contrato laboral indefinido unha vez establecidas en Galicia esas persoas e familias".

Así mesmo, reclama que se respecten unhas condicións de vida digna para as persoas e familias que dan o paso a un cambio tan transcendental nas súas vidas e sostén que, en 2023, houbo casos de "graves problemas de subsistencia para persoas incluídas neste programa pola imposibilidade de acceder a unha vivenda e pola finalización dos apoios económicos que contemplaba o mesmo".

Neste sentido, o foro pide á Xunta que garanta o acceso á vivenda e os medios económicos necesarios ata que esas persoas e familias poidan desenvolverse de forma independente. Ademais, lamenta que o Goberno galego "non recoñecese" estas "graves irregularidades" e critica tamén que, de cara á edición de 2024, non se puxese en contacto coa entidade para acordar os contidos do programa.

Rueda destaca o traballo de asesoramento da unidade móbil de atención a emigrantes retornados | Fonte: DAVID CABEZON @ XUNTA - Arquivo