A Xunta acudirá aos tribunais para esixir a convocatoria da Conferencia de Presidentes: "Dannos a calada por resposta"

O Consello da Xunta acordou este luns que Galicia acuda aos tribunais para esixir a convocatoria da Conferencia de Presidentes, tal e como anunciou o presidente autonómico, Alfonso Rueda. "O Consello da Xunta, e cónstame que outras comunidades van facer o mesmo, acordamos presentar un recurso fronte ao incumprimento do propio regulamento da Conferencia de Presidentes coa esperanza de que o Goberno central simplemente cumpra a lei e nos convoque", afirmou o máximo mandatario autonómico.

Na rolda de prensa posterior á reunión semanal do seu Executivo, o presidente da Xunta explicou que Galicia presentará un recurso administrativo para que se convoque este órgano tendo en conta que hai "asuntos importantísimos" que deben ser abordados neste foro. Rueda sostivo que o Goberno galego non ten ningunha constancia de que o Executivo estatal vaia a conovocar proximamente a Conferencia de Presidentes e lamentou ter que chegar a "estes extremos". "Son as ferramentas que nos quedan cando o Goberno central incumpre a normativa, incumpre unha obrigación", dixo.

Así mesmo, reprochou que o Goberno central trate de "substituír o sistema autonómico de diálogo" que está establecido a través da Conferencia de Presidentes por "pactos bilaterais". "O presidente do Goberno reúnese cos presidentes autonómicos que lle interesa, aos que lle debe obediencia para manterse no Goberno e, os demais, considera que temos que ser espectadores pasivos que non temos ningún dereito nin temos que ser tratados por igual".

Nun contexto no que Rueda aínda non foi recibido por parte de Pedro Sánchez, un encontro que si mantivo o lendakari vasco Inmanol Pradales a pesar de ser investido posteriomente e co presidente en funcións de Cataluña, Pere Aragonés, Rueda volveu a sinalar que "todas as comunidades autónomas" son "iguais" ante a lei e, por tanto, tamén na relación que deben ter co Executivo estatal.

O titular da Xunta lembrou que Sánchez se desprazou a estas comunidades, mentres que el, como presidente da Xunta, só recibiu unha carta na que, segundo sinalou, trasladóuselle que a reunión "sería en breve". "E o último que sei, son manifestacións de Moncloa, non sei se son veraces ou non, dicindo que non había ningunha previsión de reunión. É dicir, incumprindo e contradicíndose a eles mesmos respecto desa carta que me enviou o presidente ás tres semanas de pedir audiencia", censurou.

Alfonso Rueda sinalou que seguirá insistindo "as veces que faga falta", non por el, senón porque "fala en nome de Galicia". "Entendo perfectamente que o País Vasco e Cataluña teñan moitas cousas que falar, pero Galicia desde logo, tamén", subliñou para rexeitar un trato "absolutamente desigual". "Non é normal nin de recibo nin de respecto, que dúas nacionalidades históricas si fosen recibidas polo presidente do Goberno, que foi alí, e que a Galicia se lle da calada por resposta", censurou.