Cinco persoas feridas tras chocar un camión e dous vehículos en Padrón

Cinco persoas resultaron feridas na tarde deste luns nun accidente de tráfico rexistrado no municipio coruñés de Padrón, onde chocaron un camión e dous turismos.

Segundo a información do CIAE 112-Galicia, o suceso tivo lugar sobre as 18,30 horas no quilómetro 76 da N-550, en Cruces. Un camión que transportaba trigo, informou un particular, chocara por alcance contra un turismo e este, á súa vez, contra outro.

Aínda que nun primeiro momento parecía non haber persoas feridas, unha vez no punto, os membros do GES de Padrón solicitaron asistencia sanitaria para dous adultos e un menor, que referían molestias.

Así, os xestores do 112 pasaron aviso a Urxencias Sanitarias de Galicia-061, ademais, foron informados os axentes de Tráfico, da Policía Local, os Bombeiros de Boiro, os membros do GES de Padrón e os efectivos do Servizo Municipal de Protección Civil da localidade.

Finalmente, tras finalizar coas tarefas de limpeza da vía, o persoal do GES informou ao 112 Galicia de que, en total, ían ser trasladadas cinco persoas en dúas ambulancias.

Accidente de camión | Fonte: CONSORCIO BOMBEIROS