'Póñanse as pilas': o PPdeG esixe ao Goberno Central axilidade na xestión do litoral e á oposición que tome postura

A viceportavoz do PPdeG no Parlamento galego Cristina Sanz anunciou a presentación, por parte deste grupo parlamentario, dunha iniciativa na que insta o Goberno central a constituír, coa máxima celeridade, a Comisión Mixta de Transferencias. Todo iso para facer efectivo o traspaso dos medios materiais e persoais necesarios para que a Administración autonómica poida xestionar a costa galega, tras o respaldo do Tribunal Constitucional a este respecto.

Para iso, pediu tamén o apoio de socialistas e nacionalistas aos que instou a situarse "sobre se queren unirse e loitar polas nosas competencias ou prefiren continuar na procesión de 'Vos Caladiños' ante o desprezo que o Estado mostra con Galicia". Así o expuxo nunha comparecencia na que instou aos dous grupos a "porse as pilas" e a unirse ao PPdeG "para alcanzar canto antes unha xestión efectiva do litoral e que Galicia teña capacidade de decisión nas nosas costas".

Todo isto tras reivindicar os "compromisos" en marcha por parte do PP e criticar a xestión do Goberno central por "unha alta velocidade que non chega ou o traspaso da gratuidade da AP-9 que non están a cumprir". Ademais da política dos socialistas a nivel central, tamén criticou ao BNG, ao que pediu "unirse en defensa dos obxectivos" de Galicia "en lugar de avalar eleccións dudosas noutro país", dixo sobre o proceso electoral en Venezuela.

A viceportavoz do PPdeG no Parlamento galego Cristina Sanz, en rolda de prensa. PPDEG | Fonte: Europa Press