Convocados os 24 cursos de formación continua para o persoal dos servizos de emerxencias galegos
O prazo de inscrición abre este xoves e prolóngase ata o 9 de setembro.
Por E.P. | Santiago de Compostela | 21/08/2024 | Actualizada ás 11:51
O Diario Oficial de Galicia (DOG) publicou dúas convocatorias da Academia Galega de Seguridade Pública (Agasp) para a realización de 24 actividades formativas dirixidas aos servizos de emerxencias prestados tanto por profesionais como por voluntariado de Protección Civil. Segundo informou a Xunta, as actividades previstas suman 572 prazas e desenvolvésense entre os meses de setembro e novembro con accións de carácter presencial, semipresencial e en liña.
Así, convocan, por unha banda 14 cursos para persoal dos servizos de extinción de incendios e salvamento, grupos de emerxencias supramunicipais e servizos municipais de protección civil e emerxencias que ofertan 348 prazas. As horas lectivas dos distintos cursos oscilan entre o oito e as 40, cun global de 194 horas.
Por outra banda, para o persoal das Agrupacións de Voluntarios de Protección Civil, o DOG publica a convocatoria doutros 10 cursos con 224 prazas e 144 horas lectivas. O prazo de inscrición abre este xoves e prolóngase ata o 9 de setembro. Deberá facerse a través do formulario habilitado na web da Agasp, na que publicarán a relación de persoas seleccionadas para participar en cada un dos cursos.
