O Río Verbena Fest reúne a unha vintena de artistas ás beiras do Lérez
Unha vintena de artistas compartirán escenario no Río Verbena Fest, que celebra en Pontevedra, ás beiras do río Lérez, entre o 23 e o 24 de agosto.
Por E.P. | Santiago de Compostela | 21/08/2024 | Actualizada ás 14:43
Unha vintena de artistas compartirán escenario no Río Verbena Fest, que celebra en Pontevedra, ás beiras do río Lérez, entre o 23 e o 24 de agosto. Unha cita que xa é "un dos imprescidibles do verán", en palabras do director de Turismo, Xosé Merelles; un certame que conta co apoio da Xunta de Galicia.
Durante a presentación da cita musical, Merelles estivo acompañado polo delegado territorial do Goberno galego en Pontevedra, Agustín Reguera, xunto a representantes doutras entidades e empresas colaboradoras do certame.
O director destacou "a aposta do Executivo autonómico por favorecer o turismo de festivais e atraer visitantes motivados por ver en directo aos seus cantantes e grupos favoritos", o que está a converter a Galicia "nun referente neste ámbito" cunha oferta de eventos "con personalidade propia, que contribúe a dinamizar turísticamente o destino Galicia durante todo o ano".
Merelles tamén se referiu ao carácter transversal da cadea de valor do turismo como xeradora de "unha gran cantidade de oportunidades para os territorios". "E, en especial, para aqueles que como Galicia saben xestionar un modelo que segue tendo un enorme potencial de crecemento ordenado e planificado", insistiu.
Neste conxunto de potencialidades situou os atractivos naturais e patrimoniais da comunidade, pero tamén as propostas culturais e produtos creados ad hoc para diversificar e diferenciar a oferta turística galega, como é o caso do Río Verbena Fest.
