O PSdeG acusa a PPdeG e BNG de facer pinza na Cámara: "Queren poñernos un burka para silenciarnos"
Lara Méndez denuncia unha situación "sen precedentes" na Cámara tras impedir que Besteiro poida preguntarlle a Rueda na Cámara en favor de DO e lembran que iso non pasou cando o BNG tiña seis deputados.
Por Europa Press / Redacción | SANTIAGO DE COMPOSTELA | 04/09/2024 | Actualizada ás 13:46
O PSdeG acusou ao BNG de levar a cabo unha "pinza" co PP para restarlle a posibilidade ao Grupo Socialista de participar nunha sesión de control ao presidente da Xunta, Alfonso Rueda, en favor do deputado de Democracia Ourensá, Armando Ojea.
Nunha rolda de prensa celebrada este mércores no Pazo do Hórreo, a deputada socialista Lara Méndez censurou a "alianza vergoñosa" entre populares e nacionalistas para "limitar a capacidade para exercer a súa tarefa de control" aos socialistas ao outorgar o dereito a participar a Ojea nas preguntas ao presidente nun dos plenos deste período de sesións en detrimento do PSdeG.
Méndez asegurou que esta decisión, adoptada na xunta de portavoces celebrada o martes que configurou o calendario do novo período de sesións que se prolongará desde este mes de setembro ata o parón do Nadal, carece de "precedentes" pois "é a primeira vez que un grupo parlamentario plenamente constituído vese privado" de participar nunha sesión de control ao presidente da Xunta.
"Queren pornos un burka para silenciarnos", espetou a exalcaldesa de Lugo, que avanzou que os socialistas "loitarán" por que se lles manteña a posibilidade de participar na sesión de control de todos os plenos do curso. "A calidade democrática non pode sacrificarse en aras de conivencias, conviviencias ou pinzas políticas", engadiu.
Os socialistas rexistraron xa un escrito formal para demandar que se corrixa esta exclusión, que xa estaba contemplada no anterior período de sesións e producirase no último pleno antes do parón polas festas do Nadal. "Non podemos permitir que por evitar que un pleno se poida alongar once minutos se nos prive dun dereito fundamental", engadiu a parlamentaria antes de apuntar que os socialistas "non queren quitar capacidade de control" ao deputado que integra o grupo mixto, pero discrepan de que se faga á súa "costa".
Lembran que o BNG participou en todas as sesións de control entre 2016 e 2020 cando tiña seis deputados, polo que entenden que os socialistas "non poden ter menos dereito" a facelo cando contan con nove parlamentarios na presente lexislatura.
