O BNG reclama manter a gratuidade do cambio de hipoteca variable a fixa que vence en 2025
O deputado do Bloque esgrime que aínda que agora a situación é "lixeiramente mellor" porque o BCE decidiu baixar os tipos, a situación económica para a maior parte dos fogares e persoas "segue sendo difícil", mentres que a banca "superou xa os 23.000 millóns de beneficio en 2024
Por E.P. | MADRID | 03/12/2024 | Actualizada ás 16:39
O deputado do BNG, Néstor Rego, esixiu ao Goberno manter a medida que permite cambiar dunha hipoteca variable a unha fixa ou mixta sen pagar comisións, que expira o próximo 31 de decembro de 2024, así como a supresión das comisións por amortización total ou parcial.
Nunha batería de preguntas parlamentarias rexistradas no Congreso, Rego explica que esa iniciativa pode supor un aforro de entre 1.000 e 2.500 euros para as persoas hipotecadas e que a gratuidade tamén se aplica ás comisións por amortización parcial ou total.
Dita medida foi adoptada en novembro de 2022 e pactouse previamente entre entidades bancarias e o Ministerio de Economía no marco da renovación do Código de Boas Prácticas. O obxectivo era aliviar a carga das familias no pago das hipotecas variables, que se encareceron coa subida dos tipos de interese.
O deputado do Bloque esgrime que aínda que agora a situación é "lixeiramente mellor" porque o BCE decidiu baixar os tipos, a situación económica para a maior parte dos fogares e persoas "segue sendo difícil", mentres que a banca "superou xa os 23.000 millóns de beneficio en 2024.
FIXAR UN TOPE AOS INTERESES
"Vistas as cifras, o Goberno está a tempo de reconsiderar a súa decisión e manter a vixencia da gratuidade no cambio de hipoteca así como nas amortizacións", argumenta Néstor Rego, para engadir que, ao seu xuízo, o Executivo debería "ir máis aló" e establecer un tope aos intereses das hipotecas ou garantir a extinción total da débeda no caso de dación de pago.
Neste escenario, o BNG pregunta ao Goberno se prorrogará a vixencia da medida sobre a gratuidade do cambio dunha hipoteca variable a unha fixa ou mixta, ademais das comisións por amortización total ou parcial.
Rego tamén pregunta ao Executivo se considera que se deberían eliminar as comisións bancarias en materia hipotecaria, especialmente, nun contexto de "elevados tipos de interese". Así mesmo, interpela para saber que medidas adoptará o Goberno para protexer á cidadanía ante os "abusos bancarios" no cobro de comisións e sobre se adoptará outras medidas para protexer aos clientes financeiros como o tope aos intereses nas hipotecas.
