O Sergas recoñece que creou unha "contabilidade específica" de 500 millóns en facturas

O Servizo Galego de Saúde aínda está pendente de aplicar catro das demandas formuladas polo Consello de Contas nun informe fiscalizador sobre a súa actividade en 2022 no que cuestiona a xestión de fondos por contemplar como gastos extraordinarios desembolsos que o ente ve estruturais.

En resposta a unha pregunta feita pola deputada socialista Patricia Iglesias na Comisión 3ª de Economía e Orzamentos, reunida este xoves, a interventora xeral da Xunta, Almudena Chacón, asegurou que catro das recomendacións feitas por Contas aínda están pendentes de aplicarse, aínda que subliñou o compromiso do Goberno galego por facelo.

Trátase das demandas en materia de reforzo do sistema de compras centralizado, o cómputo do financiamento das tres fundacións sanitarias adscritas á Consellería de Sanidade, os contratos de servizo por medios alleos e os diarios de operacións.

Sobre a reclamación da deputada socialista achega do gasto desprazado, que cifrou en case 500 millóns no ano 2022, a interventora defendeu que "non se trata de facturas" que "se metan nun caixón" procedentes doutros exercicios, senón que estas teñen "reflexo na contabilidade", "non na orzamentaria" senón en "unha creada especificamente" para isto e que "se comunica a efectos de cómputo de gasto".

O conselleiro de Sanidade, Antonio Gómez Caamaño, visita o Centro de Terapias Avanzadas do Sergas, en Santiago.. XUNTA