Extinguidos os incendios de Crecente e Entrimo, tras calcinar case 500 hectáreas en catro días

A Consellería do Medio Rural deu por extinguido pouco antes das 22.00 horas deste venres o incendio forestal iniciado na noite do mércores no municipio pontevedrés de Crecente e que afectou, segundo as últimas estimacións, a 267 hectáreas de terreo. Tal e como lembrou a Xunta, a investigación in situ da Unidade de Investigación de Incendios Forestais (UIFO), dependente do Goberno galego, identificou intencionalidade neste lume. Para a súa extinción mobilizáronse cinco técnicos, 40 axentes, 71 brigadas, 44 motobombas, seis pas, 9 helicópteros e cinco avións.

Tamén quedou extinguido na mañá deste sábado, ao redor das 11.30 horas, o lume rexistrado no municipio ourensán de Entrimo, parroquia de Venceáns, que queimou unhas 223 hectáreas de monte raso no Parque Natural Baixa Limia - Serra do Xurés, segundo as últimas estimacións. Este incendio iniciouse o martes en Portugal e entrou en territorio galego ao redor das 17.00 horas do mércores, día 4. Nos labores de extinción participaron seis técnicos, 35 axentes, 67 brigadas, 23 motobombas, catro pas, 10 helicópteros e 11 avións.

Finalmente, tamén está extinguido o incendio forestal que afectaba desde a pasada noite ao municipio ourensán de Oímbra, e que queimou case 27 hectáreas. Este lume puxo en risco durante a noite unha granxa con depósitos de combustible, polo que os efectivos concentráronse nesa zona. A alcaldesa, Ana Villarino, confirmou que a instalación se "salvou" e que tampouco houbo afectación a vivendas. Na súa extinción, explicou a Xunta, traballaron oito axentes, 18 brigadas, 13 motobombas e dúas pas.