BNG e PSdeG piden máis auditorías á Xunta ante a "fevenza de adxudicacións irregulares"

O Parlamento galego recomendou ao Consello de Contas realizar unha auditoría operativa dos concellos galegos que non cumpriron a súa obrigación de render as súas contas, segundo a lei de Facendas Locais.

Foi nunha iniciativa do PP na Comisión Permanente non Lexislativa para as Relacións co Consello de Contas, na que BNG e PSOE demandaron máis fiscalización da actividade da Xunta, con denuncia, por parte dos nacionalistas, de "fervenza de adxudicacións irregulares" e de falta de "transparencia" por parte dos socialistas.

Todo iso foi rexeitado polo PP, cuxa viceportavoz segunda no Parlamento galego, Cristina Sanz, argumentou, para facer caer a práctica totalidade das propostas formuladas por ambos os grupos para incrementar os asuntos fiscalizados, que moitas responden a cuestións xa abordadas polo citado organismo.

Tamén cualificou de "absurdo" que ambos os partidos "pidan que se multiplique por catro o seu traballo, porque sería imposible de cumprir nin triplicando os medios humanos e materiais dos que dispón o Consello de Contas".

Isto no debate do primeiro asunto, as recomendacións ao Plan de Traballo do Consello de Contas de 2024, ao que os socialistas presentaron 60 propostas para incorporar á fiscalización, todas sen apoio do PP, mentres que o BNG fixo o mesmo con 58, das que só unha tivo o respaldo dos populares e con emenda desta formación.

Como resultado das votacións, o Parlamento galego recomenda ao Consello de Contas realizar unha auditoría operativa dos concellos galegos que non cumpriron a súa obrigación de render as súas contas, iniciativa do PP, e que afecta aos de Verín, A Rúa e Redondela, e propón realizar unha fiscalización da Federación Galega de Kickboxing.

POSTURA DOS GRUPOS

Antes, a parlamentaria do PSOE Elena Espinosa reprochou á Xunta un "desprezo" ao traballo do Consello de Contas. "Máis da metade eran recorrentes de anos anteriores que non se atenderon", dixo sobre os asuntos fiscalizados. "Non hai ganas de incrementar o debate sobre estes informes e a transparencia", recalcou a deputada para quen falta un "debate en profundidade". Por iso pediu unha comisión na que se concrete un plan de traballo.

Pola súa banda, desde o BNG, a deputada Noa Presas acusou ao Executivo galego de "buscar opacar a súa mala xestión" e pretender facer o mesmo coa xestión do Consello de Contas, que todos os grupos encomiaron. Foi nunha intervención con referencias ao "sobrecusto" no Hospital Álvaro Cunqueiro de Vigo e coa demanda de novo do BNG de constituír unha comisión de investigación para abordar "que está a pasar con esa fervenza de adxudicacións irregulares que estamos a coñecer".

A deputada do PP Cristina Sanz rexeitou que bloqueen "as propostas da oposición", pero argumentou que non son "realizables", polo volume de traballo que absorbe xa o citado organismo ou porque xa están incluídas en informes do mesmo. Así mesmo, dixo que xa aumentou "un 40% as fiscalizacións previstas" respecto ao ano 2023. Por outra banda, no debate do informe da memoria de hai dous anos, insistiu en que Galicia "cumpre cos obxectivos de déficit e de débeda pública".