O BNG reclama ao Goberno partidas específicas en coordinación coas CCAA para combater a EHE

O BNG reclamou ao Goberno que articule partidas específicas en coordinación coas comunidades autónomas para facer fronte á enfermidade hemorráxica epizoótica (EHE). O deputado do BNG no Congreso Néstor Rego anunciou durante unha visita a unha explotación gandeira de Guitiriz a presentación de iniciativas para demandar ao Goberno que se "implique" no despregamento de accións para conter a situación que afecta a decenas de explotacións gandeiras.

A formación frontista incide na importancia de incrementar as indemnizacións e realizar estudos sobre a incidencia desta doenza, así como a posta en marcha dunha campaña de vacinación.

Rego censurou a "pasividade" da Xunta para pór sobre a mesa medidas preventivas o que causou "resultados dramáticos" para animais e propietarios, polo que solicita ao Ministerio de Agricultura que reaccione en coordinación coas comunidades autónomas.

"O MAPA ten que estabelecer partidas orzamentarias específicas destinadas ás CCAA que permitan incrementar e mellorar as indemnizacións ás explotacións e persoas propietarias de gando afectadas pola EHE e incluír tratamentos destinados a paliar os síntomas, os servizos veterinarios e mesmo a morte do animal", aseverou Rego.

Vacas dunha gandaría de lácteo en Sabadelle | Fonte: Carlos Castro - Arquivo