O BNG esixe á Xunta sancións máis duras para as concesionarias de autobuses por incumprimentos
O deputado Paulo Ríos denuncia unha "treboada perfecta" no transporte público e critica a falta de solucións para os problemas en autobuses e ferrocarril.
Por Europa Press / Redacción | Santiago de Compostela | 18/09/2024 | Actualizada ás 13:45
O BNG reclamou á Xunta que endureza as sancións contra as concesionarias de liñas de autobús por incumprimentos dos servizos ante os problemas que, sumados aos que tamén acumula o ferrocarril, ocasiona unha "treboada transporte" no transporte de viaxeiros en Galicia.
Así o denunciou o deputado nacionalista Paulo Ríos en declaracións aos medios na estación intermodal de Santiago na mañá deste mércores acompañado pola súa compañeira na Cámara galega Iria Carreira e responsables locais da organización frontista na comarca de Santiago.
Alí, Ríos acusou ao Goberno galego e ao central de provocar unha "treboada perfecta" pola ausencia de solucións aos problemas que se están rexistrando nas liñas de autobuses e de ferrocarril e que afecta "a miles" de persoas usuarias do transporte público.
O parlamentario puxo como exemplo o acontecido o pasado venres en Santiago, cando "ata 200 persoas" quedaron "sen poder moverse en autobús ou tren, buscando billetes onde non os había e uns reforzos da Xunta que non chegaron".
Para a formación frontista, o ocorrido na capital galega é "só un exemplo" do que pasa "día a día en moitísimas localidades" de Galicia: "xente tirada nas paradas sen poder ir traballar ou estudar" por problemas no transporte relacionadas á falta de frecuencias, carencias de prazas ou atrasos. A iso sumou os problemas "e incumprimentos" nos servizos ferroviarios, responsabilidade dun Goberno do Estado "que non está a atender correctamente esta cuestión".
Así as cousas, Paulo Ríos puxo como deberes á Xunta que vaia máis aló de enviar "cartas" ás empresas concesionarias para que reforcen os seus servizos e "endureza" as sancións en caso de incumprimentos por parte de compañías que, ao seu xuízo, son "encubertas" por ser "amigas do PP, como é o caso de Monbus".
