O BNG avisa a Jácome que non apoiará máis modificacións de crédito ata que presente un proxecto de orzamento

O Bloque Nacionalista Galego non aceptará ningunha modificación de crédito máis no Concello de Ourense ata que o goberno local que encabeza o rexedor, Gonzalo Pérez Jácome (D.O.), presente un proxecto de orzamento. Así o fixo saber o portavoz da formación nacionalista municipal, Luís Seara, nunha comparecencia ofrecida para falar da comisión de pleno do pasado venres, onde o consistorio pretendía ditaminar ata un total de dez modificacións de crédito que sumadas ascendían a 22.293.576 euros.

Esa decisión aprazouse ata este mércores ante a solicitude do Partido Popular e o Partido Socialista de pospola "para mellor estudo" co apoio do BNG. Este luns, o portavoz da formación nacionalista quixo denunciar a situación, que ve "unha tomadura de pelo no último trimestre do ano". Seara fixo fincapé en que xa pediu ao alcalde, Gonzalo Pérez Jácome, "por activa e por pasiva" que presente un borrador dos orzamentos e recriminou que "como ata a data funcionáronlle as modificacións de crédito, con partidas a maioría delas infladas por enriba das necesidades reais de gasto", utiliza esa táctica que "nalgún caso diríxese a pago de compromisos de gastos contraídos no pasado".

"Isto revela unha anomalía desde o punto de vista orzamentario, dado que o concello non debería necesitar crédito para financiar compromisos pasados fóra de que se incorporasen indebidamente, é dicir, sen crédito, que é o que acabou sucedendo", expuxo Luís Seara. A ollos do BNG, a consecuencia directa desta práctica é que o alcalde, ao ser o último trimestre do ano, "podería incorporalas, no caso de que fosen aprobadas, ao exercicio seguinte; é dicir, tería un orzamento de facto no que só mete o que a el lle interesa, sen necesidade de sentar a negociar coa oposición".

Neste sentido quixo lembrar que o rexedor municipal non ten a maioría absoluta e recriminou que, por isto mesmo, "non pode facer o que lle dá a gana pretendendo que os demais sexan pagafantas da festa". Ademais advertiu que este modo de facer política coloca o consistorio "nunha situación económica delicada" que "moi posiblemente" a "curto prazo" leve a acometer "un plan de axuste cos prexuízos que ocasionaría para o conxunto dos veciños".

Nesta liña, apuntou que os expedientes de incorporación de remanentes tramitados a día de hoxe "incrementaron as previsións de gasto para o exercicio económico en curso en máis de 40 millóns de euros". "Non discutimos a necesidade de moitas das partidas, senón a trampa que Jácome tende e a situación de quebra económica que supón o uso e abuso desta fórmula para as arcas municipais", sostivo o portavoz do BNG.