O Congreso cita a Óscar Puente o 16 de outubro para explicar os seus plans para o traspaso da AP-9 a Galicia

O ministro de Transportes, Óscar Puente, deberá comparecer o 16 de outubro no Pleno do Congreso para explicar os seus plans sobre o traspaso da autoestrada do Atlántico (AP-9) á Xunta de Galicia, unha transferencia cuxa tramitación parlamentaria leva meses bloqueada na Cámara. A petición de comparecencia foi impulsada polo PP e, segundo informaron a Europa press fontes parlamentarias, este martes foi aprobada na Xunta de Portavoces do Congreso con idea de incluíla na orde do día do próximo Pleno, que se celebrará nesa segunda semana de outubro.

A semana que vén non hai Pleno e a seguinte (o mércores 9 de outubro) xa está prevista a comparecencia do presidente do Goberno, Pedro Sánchez, para dar conta da crise migratoria, tamén a instancias do PP. Por iso programouse a de Puente para mércores seguinte. En concreto, Óscar Puente deberá dar conta da "posición do Goberno en relación coa activación do traspaso da titularidade e xestión a Galicia da AP-9, así como do cumprimento dos compromisos que adquiriu en materia de implantación de novas bonificacións aos usuarios e da autoestrada, expresadas polo candidato socialista José Ramón Gómez Besteiro na campaña das últimas eleccións autonómicas".

Desde o PP galego celebraron que se deu vía libre á comparecencia, máxime ao ser no Pleno do Congreso e non só en comisión. "Non é habitual que o Goberno dea explicacións, como tampouco o fixo Sánchez na súa reunión co presidente Alfonso Rueda, pero esperamos que esta vez o fagan", afirma Celso Delgado, vicepresidente segundo da Comisión de Transportes do Congreso.

O PP CRE QUE ALGÚN DÍA PUENTE DIRÁ QUE A AP-9 "VIVE O MELLOR MOMENTO DA SÚA HISTORIA"

O deputado do PP Roberto Rodríguez ironizou con que "o que lle falta" ao ministro de Transportes, Óscar Puente, é asegurar que a AP-9 "tamén vive o mellor momento da súa historia", como asegurou do ferrocarril nunhas declaracións polas que foi reprobado hai 15 días no Parlamento de Galicia. Dúas semanas máis tarde, a Cámara galega volveu a debater este martes sobre o traspaso da AP-9 por mor dunha iniciativa do PP que reclama a elaboración dun estudo "serio e minucioso" sobre o custo do rescate e a transferencia a Galicia da autoestrada.

Na tarde na que se coñeceu que Puente deberá comparecer sobre o traspaso da AP-9 a Galicia no Congreso, onde se atopa en tramitación o cuarto intento lexislativo da Cámara autonómica por lograr a xestión da AP-9 desde a Administración autonómica, o Pazo do Hórreo viviu o debate da proposición coa que os populares reclaman un estudo como o que realizou a Xunta e que foi presentado este mes de setembro. O encargado de defender o texto foi o deputado Roberto Rodríguez, que preguntou aos socialistas se volverán "boicotear" a tramitación da lei para a transferencia aprobada no Congreso como, di, ocorreu nos últimos cinco anos.

"Galicia merece un trato equitativo que (Pedro) Sánchez lle nega", aseverou Rodríguez, que incidiu en que "o primeiro paso" para o rescate da autoestrada é levar a cabo un "estudo serio e rigoroso" do seu custo. Na quenda dos grupos, o deputado do BNG Paulo Ríos afeou aos populares que reclamen un estudo cando o encargado por eles aínda non foi remitido á Cámara a pesar da petición dos nacionalistas. "Se a vostedes lles importase algo a AP-9 ou Galicia, o informe estaría aquí 20 despois (da súa presentación)", espetou Ríos, que cre que a rolda de prensa na que foi presentado este estudo que custou "18.000 euros" saíulle "caro aos galegos" pois foi empregado unicamente como "arma arreboladiza" contra o Goberno central.

Por último, o deputado do PSdeG Carlos López Font subliñou que os socialistas apostan pola "redución progresiva das peaxes" ata a "gratuidade total" da autoestrada, un camiño que, subliñou, pasa polas "consignacións orzamentarias", co que convidou ao PP a abandonar a "hipocrisía" e facilitar a aprobación dos próximos orzamentos do Estado. Os socialistas expuxeron unha emenda de adición ao texto orixinal do PP que expuña que o estudo sobre o rescate e transferencia levase a cabe tamén sobre as autoestradas autonómicas. O Grupo Popular rexeitou sumala á súa iniciativa, que se votará xunto ao resto das proposicións non de lei na mañá do mércores.