CESM urxe implantar "xa" a xornada de 35 horas para os médicos de Atención Primaria
CESM critica que a falta de profesionais impide a aplicación do horario reducido, deixando aos facultativos sen cobertura adecuada.
Por Europa Press / Redacción | SANTIAGO DE COMPOSTELA | 25/09/2024 | Actualizada ás 13:56
A Confederación Estatal de Sindicatos Médicos (CESM) reclama ao Servizo Galego de Saúde (Sergas) que implante "xa" a xornada laboral de 35 horas semanais para "todos os facultativos", concretamente aos de Atención Primaria.
Así o pide o Sindicato Médico de Galicia (Simega), adscrito a CESM, despois de que na mesa sectorial do 11 de setembro a Administración presentase o calendario de redución horaria para o ano 2025, cando se alcanzarán as 35 horas en virtude de varios pactos coas organizacións alcanzados en abril de 2023.
Neste contexto, CESM sinala que "os únicos" que non se están acollendo a este horario son os facultativos de Primaria "por falta de profesionais nas listas de contratación", o cal non permite cubrir as horas que se deixan de prestar.
Así, o sindicato médico propón que as sete horas que estes profesionais fan os sábados teñan o carácter de extraordinarias e asúmanas "facultativos contratados" ou "voluntarios inscritos nunha lista que tería cada área sanitaria".
SUPERVISORES DE UNIDADE
Por outra banda, o sindicato de Enfermaría Satse pide ao Sergas unha mellora das condicións dos supervisores de unidades, pois mentres "os seus compañeiros van logrando certos avances", eles "asumen máis responsabilidade sen ningún tipo de recompensa".
Refírese tamén ao acordo de abril de 2023, que incluíu unha redución horaria que é "inexistente" ou "mínima" nos superviores de unidade, que levan "sen que se lle implemente ningún cambio desde o ano 2008".
