Besteiro esixe unha partida nos Orzamentos de 2025 para o dragado da ría de Pontevedra tras "10 anos de escapismo do PP"

O secretario xeral do PSdeG, Xosé Ramón Gómez Besteiro, avanzou este martes que os socialistas esixirán que se inclúan nos Orzamentos da Xunta para o próximo ano unha partida específica para o dragado da ría de Pontevedra, unha "débeda histórica" coa cidade que foi vítima de "dez anos de escapismo do Partido Popular".

Así o dixo Besteiro en declaracións aos medios no transcurso dunha visita á cidade de Pontevedra para "coñecer os problemas da cidade" e os "incumprimentos" da Xunta de Alfonso Rueda, en palabras do portavoz municipal socialista, Iván Puentes. Para Besteiro, a "falta de investimento" da Xunta en Pontevedra "é palmaria" e faise "máis notoria" no caso do dragado da ría de Pontevedra, unha cuestión que, lembrou, ten efectos ambientais e "tamén prácticos", en relación á utilización dos pantaláns.

Para liquidar esta situación, Besteiro avanzou que os socialistas van "controlar" que nos orzamentos para 2025 do Goberno galego se inclúa "unha partida específica" para o dragado da ría pontevedresa e, pola contra, demandarano no trámite de modificación dos orzamentos. Ademais, esixirán "que se actualice o proxecto" e que "se dispoña dunha partida importante para buscar a zona de vertedura dos lodos".

Gómez Besteiro apuntou que "calquera pode ver a situación real deses lodos" en marea baixa, cando se pode comprobar que "van subindo de nivel e facendo inoperativa a utilización dun verdadeiro luxo, que é ter un pantalán, un náutico, xusto pegado ao centro urbán". Ademais, lembrou as repercusións que isto ten "desde o punto de vista ambiental e marisqueiro".

"A rexeneración da ría é algo no que estamos profundamente implicados todos os socialistas", dixo Besteiro, que sacou a colación "obras como as que fai o Goberno de España na mellora da depuradora de Sanxenxo ou de Poio", así como investimentos no nodo dos Bombeiros, en acceso á AP-9 e á A-57.

Preguntado acerca de que a Xunta di estar pendente de que se fixe desde o Goberno central o lugar para depositar os lodos, Gómez Besteiro lembrou que "a responsabilidade de dicir onde se teñen que depositar" corresponde "exclusivamente á Xunta", un punto que, posteriormente, Costas terá que avaliar. "É a típica escusa que ten o Partido Popular, non só en Pontevedra, sempre hai un responsable que paraliza o proxecto menos a propia Xunta", lamentou.

Xosé Ramón Gómez Besteiro en Pontevedra | Fonte: PSDEG