Outras voces de CxG apostan por “diluírse” no “nacionalismo clásico”
O ex edil socialista e candidato de CxG en Vigo nas pasadas municipais, Miguel Barros, aposta porque esta formación “saia da terra de ninguén”.
Por Galicia Confidencial | Vigo | 12/01/2016 | Actualizada ás 17:18
“Debemos tentar unha elaboración clara que nos permita saír da terra de ninguén, e romper definitivamente o cordón umbilical ideolóxico que a moitos impídelles definirse e actuar como galeguistas socialdemócratas, federalistas e europeístas convencidos”. É unha das reflexións que fai o candidato de CxG en Vigo nas pasadas eleccións municipais, Miguel Barros.
Nun artigo titulado “Teorizar a moderación” e que Miguel Barros publicou no GC Aberto, sección aberta para que cidadáns e colectivos publiquen libremente os seus comunicados e opinións, Barros, destaca que as recentes eleccións “privaron a Galicia dun proxecto político autónomo e liquidaron ao mesmo tempo as posicións maximalistas”. “Deixaron a Galicia inerme politicamente de cara as eleccións autonómicas porque o centro-dereita permanece enfeudado ó Partido Popular, e a esquerda nacionalista facilita a hipotecado centro-esquerda ás “Mareas”, eufemismo ben claro de Podemos”, sinala.
Por iso, aposta por “afrontar os custes de teorizar a moderación como forza autónoma” ou ben diluírse “nas organizacións do nacionalismo clásico cuxo útero ideolóxico aínda non abandonamos”. Podes ler todo o artigo no GC Aberto.
Barros contesta deste xeito a outro artigo, tamén publicado no GC Aberto, por quen foi candidato de CxG en Lugo nas pasadas municipais, Ivan Marrrube, no que destacaba que “xa non vale o si, pero non” e aposta por dirixir o “barco de compromiso para unha integración na flota da marea”.
