Rueda tacha de "actuación orquestrada" as alegacións contra Altri: "Non hai 25.000 alegantes, hai 200 alegacións fotocopiadas"

O presidente da Xunta, Alfonso Rueda, tachou de "actuación orquestrada" as alegacións presentadas contra o proxecto que a multinacional Altri quere instalar no municipio lucense de Palas de Rei. A preguntas dos medios tras a reunión do Consello da Xunta despois de que o diario ABC publicase que das case 25.000 alegacións presentadas "preto do 98 % son copias dunha mesma alegación", o titular do Goberno galego sinalou que se pode falar de "actuación orquestrada", xa que "a maioría" son "fotocopias asinadas".

"Se é normal que se fale de que hai 25.000 alegantes e resulta que a maioría son copias asinadas de persoas, só hai ao redor de 200 de 25.000, se non hai unha vontade manifesta de orquestrar un sistema de alegacións, eu creo que isto admite pouca dúbida", censurou. Así, criticou que se fale de "25.000 persoas, que cada unha ten un motivo de oposición". En opinión de Rueda, o que hai son "200 alegacións, modelo tipo, fotocopiadas" e que, recoñeceu, "moita xente asinou".

"Non me meto en se as asinaron libremente ou non; seguramente si ou seguro que si, pero que isto respondía a unha campaña orquestrada é moi evidente e, por tanto, cada un que saque as súas conclusións", resolveu. Así mesmo, preguntado polas últimas críticas da Plataforma Ulloa Viva ás declaracións da conselleira de Medio Ambiente nas que sinalaba que os informes cos que conta a Xunta ata o momento son favorables, Rueda insistiu en que "hai algúns informes xa emitidos en sentido positivo", mentres que outros "aínda están en proceso de elaboración e avaliación".

En todo caso, reiterou que en canto teñan o resultado "que ditaminen os técnicos", darano a coñecer. "Esa é a gran verdade sobre o que estamos a facer e, todo o demais, moito ruído", lamentou. Ademais, asegurou que esta "actuación orquestrada", ao seu xuízo, está "en moitos casos movida por unha serie de intereses, algúns lexítimos e outros claramente con intencionalidade política". "Por tanto, tranquilidade absoluta. Os técnicos teñen os seus tempos e cando acaben esa avaliación darán o resultado e sexa cal for, por suposto, primeiro a Xunta transmitirao e despois acatarao nun sentido ou outro", aseverou.

O presidente da Xunta, Alfonso Rueda, antes de participar no Consello da Xunta | Fonte: XUNTA

A XUNTA ASEGURA QUE, AÍNDA ASÍ, TERA EN CONTA "TODAS" AS ALEGACIÓNS

Con todo, a Xunta asegurou que "todas" as alegacións presentadas ao proxecto de Altri serán tidas en conta a pesar de que a "inmensa maioría" son iguais ao corresponder a "modelos preestablecidos" nos que as persoas alegantes "limitábanse a cubrir o seu nome, dirección e firma". Así o trasladaron fontes do Goberno galego nunha resposta facilitada a Europa Press tras a denuncia das plataformas Ulloa Viva e Defensa da Ría de Arousa, que este luns denunciaron unha "manobra antidemocrática" por parte da Xunta co obxectivo de "eliminar" parte das "históricas" 23.000 alegacións que colectivos e particulares presentaron no principio do ano contra o proxecto de Altri.

Estas fontes subliñan que a Administración autonómica "está a cumprir estritamente" a normativa de participación pública e transparencia e que as case 24.000 alegacións presentadas ao proxecto serán tidas en conta "independentemente de que se lles recoñeza ou non a condición de interesado". E é que a Xunta asegura que a "inmensa maioría" dos alegantes que solicitaron ser considerados como parte interesada (o que outorga maior capacidade de acceso á información relativa á inciativa contra a que se alega) non presentaron a documentación para acreditar esa condición.

A Consellería de Economía e Industria iniciou un proceso de notificación desta circunstancia para que "tanto particulares como outras entidades acrediten" nun prazo de dez días "o cumprimento dos requisitos legalmente establecidos para ser considerados como interesados". En todo caso, subliña que "o recoñecemento ou non da condición de interesados dos particulares ou entidades nada ten que ver con que se teñan en conta as alegacións presentadas".

A Xunta lembra que a lei de Procedemento Administrativo Común das Administracións Públicas establece que o recoñecemento como interesado en procedemento está reservado a titulares de dereitos ou intereses lexítimos individuais ou colectivos, persoas que poidan verse afectadas ou asociacións e organizacións representativas de intereses económicos e sociais. Tamén destaca que a lei de Avaliación Ambiental outorga a condición de interesados a persoas xurídicas sen ánimo de lucro que teñan nos seus estatutos a protección do medio ambiente, leven constituídas, polo menos, dous anos e desenvolver a súa actividade "nun ámbito territorial que resulte afectado o plan, programa ou obxecto que deba someterse á avaliación ambiental".