Premios para a 'mellor fachada' e 'mellor cuberta' de lousa galega
Trátase da II Edición do Premio de Construción con Lousa que convoca o Clúster da Pizarra de Galicia. Entre os obxectivos desta iniciativa están poñer en valor a lousa do país como material referente nas edificacións sostibles e premiar a innovación na construción.
Por Galicia Confidencial | O Barco de Valdeorras | 15/10/2024 | Actualizada ás 09:02
Tras o éxito da primeira edición, a Agrupación industrial quixo apostar pola continuidade desta iniciativa, na súa aposta pola lousa como un elemento fundamental na construción, que mellora a habitabilidade e a sustentabilidade dos proxectos arquitectónicos.
Ao Premio de Construción con Lousa poderán presentarse obras ou proxectos de calquera persoa, empresa ou institución interesada, que fosen realizadas por profesionais, arquitectos e construtores, radicados en España ou no estranxeiro, e que se encadren dentro das categorías: de nova construción, reformas, rehabilitacións ou espazos públicos, situadas tanto en España como no estranxeiro.
As obras que opten ao premio, deberán empregar de forma significativa a lousa na maior parte das súas cubertas ou parámetros exteriores, e ser realizadas entre o 31 de outubro de 2021 e o 31 de outubro de 2024.
CATEGORÍAS DE PREMIOS
As obras poderán participar en dúas categorías, Premio á Mellor Fachada e Premio á Mellor Cuberta. En ambos os galardóns, premiarase ao arquitecto (con 1.000€ e diploma acreditativo), aparellador e colocador da obra (ambos con diploma de recoñecemento). Farase distinción dos mellores proxectos e actuacións en infraestruturas ou espazos exteriores que acheguen aspectos relevantes, innovadores e de integración do comportamento da lousa, así como a súa contribución á revitalización e mellora da calidade do espazo na contorna no que se empregou. Da mesma forma, valorarase a investigación e a innovación co devandito material construtivo.
As BASES de participación están na web do Clúster da Pizarra de Galicia e o prazo para entregar a documentación e entrar a concurso remata o 31 de outubro.
Este certame, forma parte das ferramentas contempladas no Plan de Promoción recentemente presentado pola Agrupación industrial da Lousa de Galicia. A iniciativa pon o foco no colectivo prescritor máis importante para o sector no ámbito da construción, como é o de arquitectos e arquitectos técnicos, recoñecendo o seu traballo e labor profesional.
