O Concello de Outes prohibe beber auga da traída por precaución tras rexistrarse varios casos de gastroenterite

O Concello de Outes informou á poboación da prohibición de consumir auga (para uso alimentario e consumo humano) da traída municipal tras rexistrarse varios casos de gastroenterite no municipio.

Segundo explicou a Europa Press o alcalde de Outes, Manuel González, á primeira hora deste martes o Concello tivo coñecemento de varios casos de persoas afectadas por esta doenza e, pouco despois, a Consellería de Sanidade confirmaba a situación.

A partir de aí, e por indicación das autoridades sanitarias, o Concello informou á poboación da prohibición de consumir esa auga, unha medida que afecta, tal e como sinalou, a algo menos de 4.000 persoas, un 60 % da poboación, que é a que dispón de traída municipal. En todo caso, puntualizou, moitas desas familias tamén dispoñen de traída particular, que non estaría afectada pola restrición.

O rexedor explicou que xa se están elaborando analíticas da auga, tanto por parte do Concello como de técnicos de Sanidade, e que "axiña que" se coñeza a orixe do brote de gastroenterite adoptaranse as medidas necesarias.

Manuel González sinalou que varios dos casos concéntranse nunha zona do municipio, a máis afectada as inundacións da pasada semana con motivo da borrasca Kirk, aínda que avogou por esperar o resultado dos estudos.

Auga da billa.