Cachan a un condutor de bus que se dirixía dende Cáceres ata a Festa do Marisco do Grove cun tacógrafo manipulado
Utilizaba un interruptor que modifica os rexistros do aparello dixital que controla o tempo de condución.
Por Europa Press / Redacción | PONTEVEDRA | 15/10/2024 | Actualizada ás 15:27
O condutor dun autobús dunha empresa de Cáceres foi investigado pola Garda Civil como presunto autor dun delito de falsidade documentar por utilizar o interruptor que influía nos parámetros do tacógrafo que controla o tempo de condución e descanso do traballador. Segundo informou o instituto armado, o condutor foi interceptado por unha patrulla do Subsector de Tráfico da Garda Civil de Pontevedra que realizaba un servizo de control de transportes de viaxeiros na PO-316, á altura do Grove.
O home, de 33 anos, veciño Cáceres, circulaba transportando a 56 persoas que se dirixían á Festa do Marisco, desde diferentes localidades de Cáceres con destino ao Grove. En concreto, durante un control rutineiro, os axentes descubriron que o condutor estaba a utilizar un tacógrafo dixital manipulado. O aparello permitía rexistrar períodos de descanso mentres o vehículo estaba en movemento, o que eludía a detección de infraccións.
O mesmo estaba instalado na cabina do autocar e derivaba cun cable guiado ata a caixa de cambios do vehículo onde se producía a alteración dos parámetros dando lugar á manipulación deste. Ante iso, o vehículo foi trasladado a un Centro Técnico Autorizado de Tacógrafos, onde se confirmou a manipulación que anulaba os rexistros de condución e velocidade.
A Garda Civil sinalou que esta técnica é especialmente preocupante porque permite aos condutores alongar ilegalmente as súas xornadas laborais e reducir os seus tempos de descanso, o que pon en risco a seguridade viaria e afecta negativamente o sector do transporte. Ao condutor atribúeselle a comisión dun suposto delito de falsidade documental nas dilixencias instruídas polo Grupo de Investigación e Análise do Tráfico (GIAT) do Subsector de Pontevedra, que poden levar penas de prisión de ata tres anos e multas de ata doce meses.
