Sanidade ve "inviable" a petición do goberno de Moaña de transformar o centro de saúde nun centro integral
Desde o punto de vista "técnico, temporal e contractual".
Por Europa Press / Redacción | VIGO | 16/10/2024 | Actualizada ás 14:40
O conselleiro de Sanidade, Antonio Gómez Caamaño, remitiu unha carta á alcaldesa de Moaña, en resposta á súa petición de modificar o proxecto do novo centro de saúde, en construción, para que este sexa un Centro Integral de Saúde, e xustificou, en base a un informe elaborado pola Subdirección Xeral de Investimentos do Sergas, que a petición é "inviable desde o punto de vista técnico, temporal e contractual".
Así, tras lembrar que ese cambio suporía "modificar arbitrariamente a planificación de infraestruturas sanitarias elaborada tras un exhaustivo exame", sinala que hai obstáculos "técnicos" para acometer a transformación dun proxecto xa en execución.
Ademais, advertiu do "difícil encaixe xurídico" de tramitalo como un modificado de obra, "tendo en conta o elevado importe dunha modificación dese calado", ao que se sumaría un atraso na finalización das obras (finalización prevista para a primavera próxima).
En calquera caso, o conselleiro reafirmou o "compromiso" da Xunta coa mellora da asistencia sanitaria en Moaña e na comarca do Morrazo, como demostran as obras deste novo centro de saúde, a próxima reforma do consultorio de Domaio, ou a posta en servizo dunha nova ambulancia de soporte vital avanzado de enfermaría con base neste municipio.
Finalmente, lembrou que Sanidade mantén a súa intención de construír un Centro Integral de Saúde en Cangas, que daría tamén servizo aos veciños de Moaña. "Podo asegurarche que é un obxectivo polo que merece a pena traballar xuntos", expón Gómez Caamaño na misiva, na que tamén insta a colaborar para conseguir que Cangas poña a disposición os terreos para esta infraestrutura.
