A Xunta certifica ambientalmente a gran balsa de lodos tóxicos de Alcoa
Valora o principio de acordo entre Alcoa e Ignis EQT, pero pide "coñecer que vai suceder en próximos meses"
Por Europa Press / Redacción | A Mariña | 17/10/2024 | Actualizada ás 12:41
A conselleira de Economía e Industria, María Jesús Lorenzana, informou de que a ampliación da balsa de lodos de Alcoa en San Cibrao obtivo a Declaración de Impacto Ambiental (DIA).
Nun comunicado este xoves, a conselleira sinala que esta é "outra boa noticia" que se suma ao principio de acordo anunciado por Alcoa para que Ignis EQT entre como socio investidor nun 25% do complexo da Mariña. "Vai permitir que leve a cabo unha actuación que é vital para que a planta poida continuar coa súa actividade", asegura sobre o recrecido da balsa de lodos vermellos.
Así mesmo, valora "positivamente" o acordo entre Alcoa e Ignis EQT, aínda que pide prudencia. "Agora temos que coñecer que é o que vai suceder nos próximos meses, que esixirán que todos continuemos traballando polo futuro desta planta e dos seus traballadores", afirma.
"Todas as partes implicadas terán algo que achega", e a folla de ruta móstrannos un camiño de futuro para esta planta e para os seus traballadores", incide Lorenzana.
CONVOCATORIA DE MESA DE SEGUIMENTO
A conselleira de Economía e Industria reiterou a necesidade de convocar canto antes a mesa de seguimento, solicitada fai xa máis dun mes polo Goberno galego á Secretaria de Estado do Ministerio de Industria.
Tamén insiste na urxencia de abaratar o prezo da enerxía e de ofrecer un marco enerxético estable e competitivo para a industria electrointensiva, "para o que é fundamental abordar dunha vez por todas a modificación do Estatuto dos Consumidores Electrointensivos".
Igualmente, reclama ao Goberno central que amplíe as compensacións polas emisións de CO2 ata os 850 millóns de euros permitidos para que as empresas "poidan competir en igualdade de condicións coa industria do resto de Europa".
Lembra que aínda está pendente de resolver a situación dos parques de Alcoa de competencia estatal que tiñan decaídos os seus permisos de acceso e conexión e para os que estaba comprometida unha solución por parte do Ministerio de Transición Xusta que "aínda non se produciu".
En cambio, subliñou que "todos os parques eólicos dependentes da Xunta de Galicia dispoñen xa de declaración de impacto ambiental, o que reafirma que o Goberno autonómico ten os deberes feitos".
