Acusan á Xunta de "amordazar" á sociedade nas alegacións contra Altri
A CIG cualifica de ilegal que a Xunta só atenda as alegacións "dos que demostren a súa condición de interesados".
Por Europa Press / Redacción | SANTIAGO DE COMPOSTELA | 21/10/2024 | Actualizada ás 17:53
A CIG tacha de "atentado á democracia" a pretensión da Xunta "amordazar" e "impedir a miles de persoas e colectivos alegar contra a macrocelulosa" de Altri en Palas de Rei (Lugo). Nun comunicado, o sindicato nacionalista explica que xustificou a súa condición de interesada no procedemento de autorización do proxecto despois do requirimento remitido pola Secretaría Xeral de Industria e Desenvolvemento Enerxético.
Así, acusa o Executivo galego, encabezado por Alfonso Rueda, dun "talante antidemocrático" que incumpre o artigo 53 da Lei 39/2015 que establece a condición de persoas interesadas nun procedemento administrativo, así como "incumpre tamén a propia Constitución".
Reproba que a Xunta tente "calar e deixar fose" do procedemento administrativo a persoas e colectivos alegantes "esixindo que demostren a súa condición de interesados", o que considera unha actitude "inédita". "Utilizando a maquinaria da administración pretende amordazar ás persoas que rexeitan que se autorice a planta de produción de fibras téxtiles a base de celulosa tan daniña".
Igualmente, a CIG mostra o seu apoio á manifestación convocada para o 15 de decembro en Santiago en contra da fábrica de Altri.
