Rexeitan a petición do BNG para que os centros para vítimas de violencia sexual sexan de xestión directa

O Grupo Parlamentario Popular rexeitou este martes unha moción a través da que o BNG reclamaba que os futuros centros de crises 24 horas para a atención de mulleres vítimas de violencia sexual sexan de xestión pública, o reforzo dos Centros de Información á Muller (CIM), así como a inclusión da atención psicolóxica ás vítimas na atención primaria.

A encargada de defender a iniciativa foi a deputada nacionalista Noa Presas, quen sostivo que "a Xunta tiña unha oportunidade" para fortalecer a atención ás vítimas, pero "decidiu privatizar e precarizar" estas instalacións con "persoal insuficiente que non garante a atención adecuada". Ademais, lamentou que "non van ser de xestión pública" debido á decisión "consciente" do PP para "facer negocio cos dereitos das mulleres".

"Por iso, con esta moción pedimos, sobre todo, parar esta privatización, para que estes centros sexan de xestión pública e directa, así como o reforzo dos CIM e garantir a atención psicolóxica", dixo para asegurar que se trata de "tres propostas moi claras, realistas e necesarias".

A moción contou co apoio do Grupo Socialista, cuxa parlamentaria Paloma Castro asegurou que a súa formación comparte "todo o que se pide na iniciativa" e presentou unha emenda con diversas propostas, entre as cales o BNG aceptou incluír no que se abordaban medidas para a reforma dos CIM.

Nun debate no que o deputado de Democracia Ourensana, Armando Ojea, declinou intervir; a parlamentaria do PPdeG, Raquel Arias, trasladou aos grupos da oposición que a violencia de xénero é un asunto que se debe sacar da loita partidista.

Ademais acusou aos nacionalistas e aos socialistas de ser "os culpables do maior dano" feitos ás vítimas de violencia, ao apoiar ao Goberno de Pedro Sánchez e a aprobación da Lei do si é si, ao asegurar que "permitiu que 1.450 violadores e agresores sexuais visen reducidas as súas penas e 126 saísen antes do cárcere".

Dixo que a loita contra a violencia de xénero é unha "prioridade para a Xunta" e lembrou que a galega "é a primeira comunidade cunha dirección xeral específica, que permite atender mellor ás vítimas e traballar aínda máis na prevención". Entre outras medidas, citou a posta en marcha da quenda de garda para mulleres vítimas de violencia de xénero e tamén para os seus fillos menores, a asistencia integral aos nenos orfos, así como a facilitación de vivendas tuteladas para vítimas de violencia con enfermidades mentais, que proximamente se ampliará a vítimas con problemas de adicción.

Raquel Arias dixo que "moitos deses avances aprobáronse no Parlamento por unanimidade", pero lamentou que o pasado mes de decembro "o BNG e o PSdeG rompesen o consenso e non votasen a favor da Lei de igualdade, a pesar de que foron aceptadas a maioría das súas propostas".

BATERÍA DE MEDIDAS EN MATERIA DE SAÚDE MENTAL

Na sesión, ademais, o PPdeG rexeitou cos seus votos outra moción do Bloque, neste caso defendida pola parlamentaria Montse Prado, na que se instaba á Xunta a pór en marcha unha batería de medidas en materia de saúde mental.

En concreto, o texto, entre outras cuestións, emprazaba á Xunta a presentar no Parlamento de Galicia un informe sobre a situación mental en Galicia, a informar os resultados do desenvolvemento do Plan de Saúde post Covid e do Plan galego de prevención do suicido, así como a concretar o anuncio feito polo presidente da Xunta, Alfonso Rueda, sobre a incorporación de psicólogos clínicos ao centro de saúde.

O texto tamén reclamaba á Xunta que incluíse nos orzamentos partidas para a incorporación de psicólocos clínicos nos centros de saúde, así como para a creación dunha unidade de hospitalización infanto-xuvenil en cada área sanitaria e que estas estean dotadas de persoal docente para garantir a continuidade académica dos nenos e adolescentes que reciben asistencia na mesmas.

Ademais, instaba á Xunta a presentar no prazo máximo dun mes un informe co estudo da necesidade de persoal sanitario de saúde mental tanto en atención primaria como hospitalaria. Aínda que a iniciativa contou co apoio do deputado de Democracia Ourensana e dos nove parlamentarios socialistas, cos que se chegou a transaccionar o texto para incorporar algún matiz, non saíu adiante ao contar co rexeitamento da bancada popular.

A deputada do PPdeG Encarna Amigo lembrou que o Goberno galego xa avanzou que o futuro Plan de saúde mental incorporará psicólogos clínicos nos centros de saúde dependentes dos servizos de pediatría.

Ademais, subliñou que o compromiso da Xunta coa saúde mental xa quedou patente no ano 2017, cando se implementou o Plan de prevención do suicidio de Galicia. "Aínda que lles moleste recoñecelo, foi o primeiro plan autonómico implantado en España", dixo, para sinalar que, posteriormente, aprobouse o Plan de Saúde Mental 2020-2024, que converteu de novo a Galicia nunha "comunidade autónoma pioneira por definir unha folla de ruta ambiciosa en saúde mental".

Encarna Amigo, que lembrou que nesta lexislatura creouse unha subdirección de Saúde Mental para dedicarse "única e exclusivamente" a este asunto, puxo en valor tamén que a Xunta xa anunciou a incorporación de psicólogos clínicos aos centros de saúde.

Noa Presas. BNG