Rueda aposta pola substitución xeracional no agro: "De nada serviría a modernización do campo sen mozos que collan o relevo"

O presidente da Xunta, Alfonso Rueda, reivindicou este mércores a aposta do Goberno galego por fomentar a substitución xeracional no agro con novos instrumentos como o banco de explotacións e máis liñas de axudas. "De nada serviría a modernización do campo galego nos últimos anos se non podemos garantir que os mozos van coller a testemuña", advertiu. Durante unha visita a unha granxa en Boqueixón, na que estivo acompañado da conselleira do Medio Rural, María José Gómez, Rueda puxo en valor os "estímulos" que ofrece a Xunta como unha nova orde de achegas para favorecer a sucesión neste tipo de negocios, dotada de 2,1 millóns entre 2025 e 2029.

Ademais, Galicia contará antes de que finalice o ano cunha plataforma para pór en contacto aos titulares de explotacións agrícolas e gandeiras que van cesar a súa actividade con persoas interesadas en asumir esta xestión. Unhas medidas que se enmarcan no plan para fomentar a substitución xeracional no campo que ten en marcha a Xunta e que conta, entre outras iniciativas, con accións de formación, sensibilización e tutorización.

Apoios grazas aos que, verbalizou Rueda, "case 5.000 mozos incorporáronse como socios" a explotacións agrícolas ou gandeiras na comunidade desde 2009. O obxectivo é seguir avanzando na substitución xeracional, "consolidar a comunidade como un referente no sector e promover un campo forte e competitivo". A tal fin, conclúe o Goberno galego, o orzamento da Consellería do Medio Rural sobe un 3,5 % para o próximo ano ata superar os 700 millóns de euros.