A Coruña, a provincia máis supersticiosa de España: 3 de cada 10 coruñeses viviron experiencias paranormais

Eu non creo, pero habelas hainas... Cantas veces tes escoitado este dito? Os galegos somos un pobo de mitos e lendas, supersticioso por natureza, por iso non é de estrañar que un recente estudo apunte á provincia da Coruña como a máis supersticiosa de España. En concreto, agrupa ao 5 % de toda a poboación supersticiosa que hai no país, tal e como se reflexa nunha enquisa realizada entre máis de 3.000 persoas con motivo da festividade de Todos os Santos por unha empresa de entretemento 'online'.

Segundo os resultados, A Coruña rexistra un 47 % de toda a poboación que se declara abertamente supersticiosa, isto é, practicamente un de cada dous coruñeses é superticioso. Unha cifra que, en termos nacionais, equivale ao 5 % e convírtea na provincia máis supersticiosa de España. Pontevedra ocupa o segundo lugar en Galicia, cun 44 %; mentres que Ourense e Lugo rexistran cifras moito máis baixas, con apenas un 6 % e un 3 %, respectivamente, e lonxe de que podería pensarse ao tratarse das provincias do interior, máis ruralizadas.

Deste xeito, Galicia, no seu conxunto, encabeza o ranking nacional cun 31 % de persoas declarando ser supersticiosas, o equivalente a máis de 3 de cada 10 galegos; seguida por Madrid e Andalucía, ambas cun 28 %. Sen embargo, os resultados do estudo indican que as cifras galegas poderían ser aínda máis altas, xa que do 69 % que asegura non ser supersticioso, case a metade (46 %) confesa realizar accións supersticiosas "por se acaso". Por outra banda, as autonomías menos supersticiosas son Baleares e Cantabria, empatando nun 16 %. E, dentro de Baleares, Mallorca destaca como a provincia con menor porcentaxe de supersticiosos, só un 4,6 %.

O PODER DA MADEIRA, ENTRE AS SUPERSTICIÓNS MÁIS POPULARES

De entre todas as crenzas supersticiosas, tocar madeira para espantar a desgraza é a máis popular entre os galegos, cun 63 % dos supersticiosos enquisados crendo no seu poder, isto é, máis de 6 de cada 10 galegos. Séguelle pedir un desexo a unha estrela fugaz, cun 53 %; e, en terceira posición, os trevos de catro follas, símbolo tradicional da boa sorte, cun 48 %. O psicólogo e profesor de intervención sociocomunitaria, Joan Gea, explica que "as supersticións e crenzas sobrenaturais permiten ás persoas xestionar o medo e a incerteza da vida, proporcionando explicacións simples ao inexplicable; estas crenzas están arraigadas na nosa cultura, polo que buscamos sesgos cognitivos, como o de confirmación, para reforzar e mantelas vivas".

GALICIA, A SEGUNDA COMUNIDADE MÁIS PARANORMAL DE ESPAÑA

O informe tamén revela que o 32 % (máis de 3 de cada 10 galegos) dos enquisados en Galicia afirma ter vivido algunha experiencia paranormal ao longo da súa vida, sendo só superado por Castela-A Mancha, cun 35 %. Porcentaxes bastante por enriba da media nacional, ubicada no 27 %. Entre as manifestacións máis comúns en Galicia atópanse os ruídos inexplicables (31 %), a sensación de ser observado sen motivo aparente (27 %) e presenciar aparicións (17 %). No plano provincial, A Coruña volve destacar ao concentrar o 32 % das experiencias paranormais galegas, o que representa o 12 % do total nacional, só superada por Toledo, que concentra o 14 % dos casos a nivel estatal.

METODOLOXÍA

O estudo foi realizado a partir dunha enquisa a 3.000 persoas en toda España, centrada nas súas crenzas en supersticións e fenómenos sobrenaturais, así como nos seus hábitos automáticos e experiencias persoais relacionadas co paranormal. As porcentaxes reflexan a proporción de respostas obtidas en cada categoría. Para asegurar a integridade dos resultados, elimináronse as respostas daquelas comunidades autónomas que non chegaron ao mínimo de 100 respostas. Máis información neste enlace.