SOS Sanidade Pública entrega centos de firmas para que se abra o consultorio de Hío, en Cangas

Membros da Plataforma SOS Sanidade Pública da área do Vigo acompañaron este xoves a representantes de varios colectivos de Hío (Cangas), no acto de entrega de centenares de firmas recollidas para reclamar a reapertura do consultorio médico desta parroquia.

Así, presentaron na delegación do Sergas na rúa García Barbón máis de 600 firmas para pedir que volva abrirse ese centro sanitario, pechado desde a pandemia de Covid, o que obriga aos habitantes da parroquia a desprazarse ata o centro de saúde de Aldán.

Esta situación, denunciaron, "orixina preocupación nas familias, porque non existe un transporte público regular e frecuente entre estas dúas parroquias". Por iso, colectivos veciñais iniciaron unha recollida de firmas para reclamar ao xerente da área sanitaria de Vigo a reapertura do consultorio e que regresen o médico e a enfermeira que agora están desprazados en Aldán.

Entrega de firmas na delegación do Sergas en Vigo, para reclamar a reapertura do consultorio médico da parroquia de Hío, en Cangas (Pontevedra).. SOS SANIDADE PÚBLICA | Fonte: Europa Press