Quen será o gañador do concurso para a rehabilitación do Pazo de Lourizán?

Os membros do xurado do concurso para a reforma do Pazo de Lourizán percorreron esta semana as instalacións do edificio e a súa contorna para analizar detalladamente in situ os sete proxectos finalistas antes de tomar unha decisión. Tras dar por finalizada a rolda de visitas, nos próximos días emitirase o fallo que dará a coñecer ao equipo gañador, que recibirá 48.400 euros, ademais de resultar adxudicatario para a redacción do proxecto básico e de execución.

O certame tamén contempla un segundo premio de 24.200 euros, un terceiro de 18.150 euros e accésits de 12.100 euros para os restantes estudos de arquitectura finalistas. Unha vez feita pública a decisión, as sete propostas formarán parte dunha exposición aberta ao público na cidade de Pontevedra que se inaugurará en novembro.

Á fase final do concurso de ideas accederon inicialmente oito proxectos arquitectónicos, aínda que o xurado decidiu excluír un dos equipos finalistas por incumprir as bases administrativas e técnicas. Para o proxecto de rehabilitación integral do pazo, a Xunta conta cun orzamento estimado de máis de 17 millóns de euros ata 2026. A súa previsión contempla iniciar as obras o próximo ano para finalizar a recuperación deste edificio histórico en 2027.

O xurado visita o Pazo de Lourizán antes de elixir o gañador do concurso para a súa rehabilitación | Fonte: XUNTA